Drejtori për Diasporë, Ekrem Simnica, mori pjesë në solemnitetin e nismës për ndërtim të xhamisë së re në Mengen të Gjermanisë

Me ftesë të bashkatdhetarëve tanë me punë në Gjermani, drejtori për Diasporë në Kryesinë e Bashkësisë Islame të Kosovës, Ekrem ef. Simnica, mori pjesë në solemnitetin e nismës për ndërtim të xhamisë së re në Mengen të Gjermanisë.
Të pranishmit fillimisht i përshëndetën Adnan Abdiu, kryetari i Këshillit iniciativë, Mensur ef. Halili, kryetar i Unionit të Qendrave Islame në Gjermani, dr. Reshat Ibishi, kryetar i BFI-së së Italisë, prof Muhamed ef. Sytari, myfti i Shkodrës, hoxhë Ardian Sejdiu etj.
Drejtori për Diasporë në fjalën e tij përshëndeti të pranishmit në emër të BIK-ut, institucioneve të saj dhe të Myftiut Tërnava. Ai foli për ca pika të rëndësishme mbi xhaminë, vlerën dhe rolin e saj, në veçanti mbi vlerën e kontributit në ndërtimin e saj.
Ishte një pritje madhështore me një respekt të madh. Te të gjithë ndihej një gëzim i madh dhe me një dëshirë që sa më shpejt të nisen punimet e fillimit të xhamisë. Burra, gra, të rinj e të reja, fëmijë, mysafirë e dashamirë nga të gjithë anët, nga Gjermania, Austria, Zvicra dhe Italia formuan ambient të lartë dhe dhanë kontributin e tyre madhështor, duke treguar dashurinë e madhe ndaj ndërtimit të xhamisë, ku brenda disa orëve u tubuan mbi 500 mijë euro, me të cilat shumë pritet që shumë shpejt të niset xhamia e re në Mengen.
Drejtori për Diasporë i siguroi mërgimtarët se Bashkësia Islame e Republikës së Kosovës është shumë e përkushtuar që të forcojë dhe të shtojë komunikimin dhe bashkëpunimin me të gjitha xhamitë shqiptare në diasporë, me qëllim të bashkërenditjes së aktiviteteve në të mirë të mërgatës sonë.
Zoti e bekoftë këtë nismë të madhe dhe tejet të dobishme për bashkatdhetarët tanë!