Janë bërë tre muaj prej që është bllokuar Fondi i Kursimeve Pensionale të Kosovës, pasi nga fillimi i marsit ky institucion është pa bord.
Për ata anëtar janë hapur dy konkurse dhe i fundit ka zgjatur deri më 5 maj.
Në ndërkohë, Komisioni përzgjedhës që përbehet nga Ministri i Financave, Guvernatori i BQK-së dhe Auditorja e përgjithshme akoma nuk ka vendosur për këta emra.
E është BQK që paktën ka dhënë shpresa që kjo situatë është në proces.
“Ju njoftoj se Komisioni për Përzgjedhje është në proces të përzgjedhjes së kandidatëve për anëtarë të Bordit Drejtues të Fondit të Kursimeve Pensionale të Kosovës-FKPK. Puna e Komisionit për Përzgjedhje, pritet të përfundojë së shpejti dhe do të komunikohet në pajtim me dispozitat e aplikueshme ligjore”, thonë nga BQK-ja.
Këtë e ka konfirmuar edhe vet Ministri i Financave, Hekuran Murati i cili i ka thënë televizionit që emërimi i anëtarëve të bordit është në proces.
Ndërsa nga institucioni i Auditorit të përgjithshëm nuk kanë dhënë përgjigje konkrete për ecurinë e procesit.
“Lidhur me kërkesën tuaj ju lutem t’i drejtoheni Bankës Qendrore si bartëse e procesit. Auditorja e Përgjithshme i përgjigjet të gjitha kërkesave sipas përgjegjësive të përcaktuara me ligj”.
Por, gjithë kjo shtyrje e këtij procesi për tre muaj sipas anëtarit të Komisionit për Buxhet, Mergim Lushtaku po bëhet që ky institucion të kapet nga pushteti.
“Guvernatori tash është me Ushtrues detyre, një ushtrues detyre i cili është zgjedhur anëtar i bordit të BQK-së e i cili ka qenë më herët edhe kandidat i Vetëvendosjes, shihet qartë që ka një lidhje që donë të politizojnë dhe të kapin me të vërtetë institucionet publike”, ka thënë deputeti i PDK-së, Mergim Lushtaku.
