14.1 C
Pristina
Tuesday, May 28, 2024

Sekretet amerikane: Serbia pranoi të furnizonte Ukrainën me armë!

Më të lexuarat

Dyfytyrësi e Vuçiçit apo presioni amerikan?

Serbia, i vetmi vend në Evropë që ka refuzuar të sanksionojë Rusinë për pushtimin e saj në Ukrainë, ka rënë dakord të dorëzojë armë në Kiev, ose i ka dërguar tashmë atje, sipas një dokumenti konfidencial të Pentagonit, raportoi Reuters.

Dokumenti, i cili përmbledh përgjigjet e qeverive evropiane ndaj kërkesave të Ukrainës për trajnime ushtarake dhe ose armë, ishte në mesin e dhjetëra dokumenteve të klasifikuara të publikuara në internet javët e fundit në atë që mund të jetë rrjedhja më serioze e informacionit të klasifikuar amerikan në vite.

I titulluar “Evropa, reagimi ndaj konfliktit Rusi-Ukrainë”, dokumenti në formën e grafikut rendit “pozicionet e vlerësuara” të 38 qeverive evropiane në përgjigje të kërkesave të Ukrainës për ndihmë ushtarake.

Tabela tregoi se Serbia refuzoi të ofronte trajnime për forcat ukrainase, por u zotua të dërgonte “ndihma vdekjeprurëse” ose i kishte dorëzuar tashmë ato. Gjithashtu thuhet se Serbia ka vullnet politik dhe aftësi ushtarake për të furnizuar Ukrainën me armë në të ardhmen.

Dyfytyrësi e Vuçiçit apo presioni amerikan?

Dokumenti është shënuar me SECRET dhe NOFORN, i cili ndalon shpërndarjen e tij për shërbimet e huaja të inteligjencës dhe ushtarakët.

Dokumenti mban datën 2 mars dhe është i vulosur me vulën e zyrës së Shtabit të Përgjithshëm të SHBA.

Reuters nuk mundi të verifikonte në mënyrë të pavarur vërtetësinë e dokumentit, sipas tekstit të agjencisë britanike.

Zyra e presidentit serb Aleksandar Vuçiç dhe ambasada e Ukrainës nuk iu përgjigjën menjëherë një kërkese për koment.

Pentagoni gjithashtu nuk iu përgjigj menjëherë pyetjeve të Reuters në lidhje me referencën ndaj Serbisë në dokument dhe më parë refuzoi të komentojë mbi ndonjë nga dokumentet e zbuluara.

Kujtojmë se qeveria e Vuçiçit ka shprehur neutralitet në luftën në Ukrainë.

“Nëse ky dokument është i vërtetë, ai tregon ose dyfytyrësinë e Vuçiçit përballë Rusisë, ose ai është nën presion të madh nga Uashingtoni për të dorëzuar armë në Ukrainë,” tha Janusz Bugajski, një ekspert i Evropës Lindore.

Departamenti i Drejtësisë po heton rrjedhjen, ndërsa Pentagoni po vlerëson dëmin e shkaktuar në SHBA.

Dyshimet e Moskës

Grafiku i Pentagonit i ndau përgjigjet ndaj kërkesave të Ukrainës për ndihmë në katër kategori: vendet që janë zotuar të ofrojnë trajnime dhe ndihmë vdekjeprurëse; vendet që kanë ofruar tashmë trajnime, ndihmë vdekjeprurëse, ose të dyja; vendet me aftësi ushtarake dhe vullnet politik “për të ofruar ndihmë vdekjeprurëse në të ardhmen”.

Austria dhe Malta ishin dy vendet e vetme që shënuan “jo” në të katër kategoritë.

Zbulimi i grafikut vjen pak më shumë se një muaj pasi dokumentet e publikuara në një kanal pro-rus në aplikacionin global të mesazheve Telegram dyshohet se treguan dërgimin e raketave tokë-tokë në Kiev nga prodhuesi serb i armëve Krušik.

Në mars, Moska njoftoi se i kishte kërkuar Beogradit një shpjegim zyrtar për dërgesat e supozuara, njoftoi agjencia shtetërore e lajmeve TASS deklaratën e zëdhënëses së Ministrisë së Jashtme ruse Maria Zakharova.

Por Krušik mohoi se kishte dorëzuar raketa ose armë të tjera në Ukrainë, dhe Vuçiç i quajti ato akuza një “gënjeshtër famëkeqe”.

“Ne nuk kemi eksportuar asnjë armë apo municion në Rusi apo Ukrainë”, tha ai gjatë një vizite në Katar më 5 mars.

Reuters nuk mund të konfirmonte në mënyrë të pavarur vërtetësinë e dokumentacionit në lidhje me dërgesën e postuar në Telegram.

Mohimet e Vuçeviçit

Që nga fillimi i luftës në shkurt të vitit të kaluar, Vuçiç është përpjekur të balancojë lidhjet e ngushta me Moskën me synimin e tij për t’u bashkuar me Bashkimin Evropian, shton agjencia.

Megjithatë, Serbia është e vetmja nga 44 vendet evropiane që u përmbajt nga vendosja e sanksioneve ndaj Rusisë.

Ministri i Mbrojtjes i Serbisë, Millosh Vuçeviç, mohoi dijeninë e Reuters, duke theksuar se “Serbia nuk ka dhe as do t’i shesë armë, as palës ukrainase e as ruse dhe as vendeve që e rrethojnë atë konflikt”.

“Dikush padyshim synon të destabilizojë vendin tonë dhe ta tërheqë atë në një konflikt në të cilin ne nuk do të marrim pjesë. Ne i qëndrojmë vazhdimisht politikës sonë të vendosur”, tha Vuçeviç për Tanjug. /tesheshi.com/

- Advertisement -spot_img

Më tepër

Të fundit