Kulla e re në qendër të Tiranës, e quajtur “Mount of Tirana”, prezantuar një ditë më parë nga kryebashkiaku Veliaj, do lartohet mbi një pronë të Komunitetit Musliman.
Siç mund të shihet dhe në market, ajo është e vendosur aty ku dikur ishte Disco Albania, në cepin e lulishtes ku dikur ishte gropa famëkeqe e Hajdin Sejdisë. Aty, në vitin 2011 u planifikua të ndërtohet Xhamia e Re(ose e Madhe) e Tiranës, pas një konkursi ndërkombëtar me 100 studio ndër më të prestigjozet në botë, organizuar nga Rama, atë kohë kryebashkiak.
Projekti u fitua nga studio daneze BIG, por që nuk u realizua, pas PD atëherë në pushtet e pamundësoi për arsye të qarta politike, duke e zhvendosur ndërtimin e xhamisë, sipas një modeli osman të diktuar nga KMSH-ja e kohës me kryetar të ndjerin Selim Muça. Tashmë pritet inaugurimi pikërisht i ksaj xhamie, ndryshe, e Namazgjasë, pasi është ndërtuar pikërisht në vendin ku dikur ishte namazgjaja, një vendfalje në natyre e dedikuar për dy Bajramet.
Por le t’i kthehemi asaj çfarë do thoshte Rama për truallin ku ndërtohej xhamia e re, ajo nga studio daneze. Sa i përket çështjes së truallit, ai do thoshtë se afro 7500 metra katror ishin në pronësi të Komunitetit Musliman aty. Do duhet dhe 5000 metra katrorë të tjerë për të plotësuar të gjithë hapësirën e nevojshme për xhaminë e madhe. Për këto 5000 metra, Rama tha se ato mund të siguroheshin me kompensim, pasi KMSH zotëronte shumë prona në Tiranë, gati kudo.
Tani, aty ku do qe xhamia e projektuar, pra mbi një pronë muslimane, do jetë një kullë e lartë. Nuk dihet se ç’status aktual ka ajo pronë tashmë, por thjesht po sillet në kujtesë pohimi i Ramës mbi atë pronësinë e atij trualli ku do lartohet “Mount of Tirana”./tesheshi.com/
