Krimet e përbindshme të një shteti në një botë që bën sehir
Tragjedia njerëzore vazhdon në Rripin e Gazës si rezultat i luftës së nisur nga Izraeli kundër palestinezëve më 7 tetor 2023 dhe shtohet çdo ditë, pa zërin e të vuajturve që të arrijë në botë, përveç asaj që regjistrohet nga kamerat, mediat dhe dëshmitarë okularë.
Ndër dëshmitarët e kësaj tragjedie të paprecedentë në rajon, është edhe Birsen Gaskell, një anesteziologe, e cila punoi brenda Rripit të rrethuar për më shumë se dy javë përpara se të vinte në Britaninë e Madhe.
Gaskell hyri në Gaza me një ekip nga Mjekët pa Kufij dhe iu bashkua stafit mjekësor në qytetin Rafah (në Rripin jugor) midis 4 dhe 21 shkurtit për të ofruar shërbime të kufizuara mjekësore në një zonë që përmban rreth 1.5 milion njerëz të zhvendosur.
Britmat e fëmijëve pas bombardimit
Në një intervistë për Anatolia, mjekja tregoi detajet e asaj që dëshmoi në Rripin e Gazës, për tragjedinë njerëzore që preku të gjitha sferat e jetës së përditshme të atyre njerëzve.
Ajo thotë se vendosi të shkojë në Rripin e Gazës për të trajtuar njerëzit, qoftë edhe në një shkallë të vogël, pas pamjeve të vrasjeve, gjymtimit dhe plagosjes që mund të shihte në mediat elektronike.
Ajo shtoi se ishte e shkatërruar dhe e trishtuar kur hyri në Rripin e Gazës, veçanërisht për shkak se shpërthimet e bombardimeve jehonin ditë e natë dhe vazhdimisht, të shoqëruara me britmat e fëmijëve, veçanërisht.
Lidhur me atmosferën mbizotëruese në Rafah pasi hyri në të, ajo shpjegoi se çdo civil apo punonjës shëndetësor që takonte fliste për frikën, humbjen e anëtarëve të familjes apo miqve, duke treguar shumë histori të dhimbshme dhe tragjike.
Ajo tregon se më së shumti është tronditur nga ndjenja e frikës dhe panikut tek fëmijët.
“Kur po largohesha nga Rripi i Gazës u ndjeva sikur po i tradhtoja… u ndjeva në faj. Unë kisha mundësi të largohesha nga zona, por ata nuk kanë zgjidhje, duhet të qëndrojnë atje”, vijoi ajo.
Mjekja shpreh shqetësimin për civilët atje edhe sot, duke kujtuar vuajtjet e tyre të përditshme, duke menduar për fatin e tyre dhe shton se nuk e ka të lehtë askush të përballet me situata të tilla.
Gaza, e papërshtatshme për jetën
Lidhur me situatën shëndetësore në Rripin e Gazës, Gaskell shpjegon se civilët, veçanërisht fëmijët, vuajnë nga lëndime komplekse që kërkojnë trajtim nga mjekë specialistë, duke theksuar se ky grup nuk merr trajtim të mjaftueshëm për shkak të mungesës së furnizimeve mjekësore dhe shërbimeve shëndetësore.
“Përsa i përket kushteve humanitare dhe të shërbimit në përgjithësi, kini parasysh se objektet publike janë prishur plotësisht në Rrip, të cilin e cilësova si një vend jo më i përshtatshëm për jetën. Në të vërtetë, Gaza është kthyer në ferr në Tokë dhe nuk është më e mundur të jetosh atje për shkak të privimit të nevojave elementare të jetës, si uji, rryma, arsimi dhe shëndetësia, paralelisht me gjendjen e kaosit”.
Lidhur me rolin e mjekëve të huaj që hynë në Rripin e Gazës për një periudhë të kufizuar, Gaskell beson se ata bëjnë çmos për të shëruar plagët e njerëzve, por pavarësisht kësaj, përpjekjet e tyre dështojnë për shkak të përmasave të dëmtimeve dhe lëndimeve.
Ajo theksoi se më parë kishte hyrë në shumë zona lufte dhe konflikti, për shembull në Jemen, Irak, Sudanin e Jugut dhe Nigeri, por tha se misioni i saj më i vështirë ishte në Rripin e Gazës.
Ajo e mbylli fjalën e saj duke thënë: “Ajo që po ndodh në Gaza është një fatkeqësi humanitare në të gjithë kuptimin e fjalës dhe nuk ka asnjë justifikim për këtë dhimbje dhe vuajtje, duke kërkuar që të parandalohet që të vazhdojë”.
Gjatë luftës së Izraelit në Gaza, 32 spitale dhe 53 qendra ndaluan ofrimin e shërbimeve mjekësore për shkak të sulmeve të drejtpërdrejta nga ushtria izraelite dhe 155 qendra shëndetësore u vunë në shënjestër, sipas statistikave nga zyra e qeverisë për media në Rrip. /tesheshi.com/
