Elon Musk bleu Twitter, duke premtuar ndryshime gjithëpërfshirëse për një nga platformat më të mëdha të mediave sociale në botë.
Në një mesazh për reklamuesit javën e kaluar, biznesmeni miliarder tha se ai e bleu kompaninë “sepse është e rëndësishme për të ardhmen e kulturës që të ketë një platformë të përbashkët dixhitale ku dikush mund të ketë një bisedë të shëndetshme pa përdorur dhunë”.
Pyetja, megjithatë, që ka lindur që kur Musk bleu Twitter është pse ai papritmas po mendon të krijojë një “aplikacion për gjithçka” dhe çfarë saktësisht do të thotë kjo?
Musk nuk ka dhënë shumë detaje se si do të realizojë vizionin e tij për të ardhmen e platformës.
Ideja e një aplikacioni “gjithçka”, i referuar shpesh si “super aplikacion”, është i popullarizuar në Azi dhe kompanitë e teknologjisë në mbarë botën kanë bërë përpjekje në këtë drejtim, sipas Reuters.
Çfarë është një “Super App”?
Një “super aplikacion”, ose siç e quan Musk, një “aplikacion për gjithçka”, është përshkruar si “thika e ushtrisë zvicerane” e aplikacioneve celulare, duke u ofruar përdoruesve një sërë shërbimesh, duke përfshirë mesazhe, rrjete sociale dhe pagesa dhe tregje komerciale.
Këto aplikacione përdoren gjerësisht në Azi pasi telefonat celularë janë mjeti kryesor për të hyrë në internet për shumë njerëz, sipas Scott Galloway, një profesor në Universitetin e New York-ut.
Shembuj të super aplikacioneve
Super aplikacioni kinez WeChat ka mbi një miliard përdorues në muaj, sipas të dhënave, dhe është një pjesë kyçe e jetës së përditshme të shumë njerëzve në Kinë.
Përdoruesit mund të gjejnë një makinë ose taksi, t’u dërgojnë para miqve ose familjes ose të bëjnë pagesa te tregtarët. Në vitin 2018, disa qytete kineze filluan të provonin WeChat si një sistem identifikimi elektronik që do të lidhej me llogaritë e përdoruesve, sipas South China Morning Post.
Pse Musk dëshiron të krijojë një super aplikacion?
Gjatë një sesioni me punonjësit e Twitter në qershor, Musk vuri në dukje se nuk ka asnjë aplikacion si WeChat jashtë Azisë.
“Ju në thelb jetoni përmes WeChat në Kinë,” tha ai, duke shtuar se ai sheh një mundësi për të zhvilluar një aplikacion të tillë.
Shtimi i më shumë mjeteve dhe shërbimeve në Twitter mund të ndihmojë gjithashtu Musk të arrijë qëllimet e tij të larta të rritjes për kompaninë. Gjatë seancës, Musk tha se dëshiron që Twitter të shkojë nga 237 milionë përdorues në “të paktën një miliard”.
Ndër të tjera, Facebook dhe Instagram i Meta Platform Inc kanë kërkuar të zgjerohen përtej rrjeteve sociale dhe mesazheve në tregtinë elektronike./tesheshi/
