Me dhjetëra mijëra shqiptarë kanë rrezikuar jetën ndër vite duke sfiduar detin me gomone për të shkuar në Itali. Të tjerë, duke u fshehur në kamiona apo trena kanë arritur të mbërrijnë në Britaninë e Madhe.
Megjithatë, deri më sot, asnjëherë nuk ishte parë një emigrant që të fshihet në motorin e një makine.
Një 18-vjeçar nga Afganistani, emri i të cilit nuk është bërë i ditur, u fsheh në vendin më të pazakontë, në motorin e një makine, në një traget që po udhëtonte drejt portit italian të Barit nga Greqia.
Për fatin e keq të klandestinit, ai u ndalua në mënyrë krejtësisht rastësore, nga një kontroll rutinë pas rrugës prej 20 orësh.
Në mënyrë që të reduktonte vështirësinë e qëndrimit në një pozicion krejtësisht të pazakontë, 18-vjeçari kishte vendosur një batanije poshtë motorit dhe kishte marrë me vete vetëm një shishe ujë.
Sipas ekspertëve, afgani rrezikoi shumë me jetën e tij duke udhëtuar në këtë mënyrë, pasi vendet ku transportohen makinat në një traget janë të njohura për lëshimin e gazrave vdekjeprurës, ndërsa nëse makina do të kishte lëvizur pa e kuptuar prezencën e emigrantit, ai do të kishte vdekur nga nxehtësia dhe djegiet./tch/kohaislame
