Lëshimi që do ishte i gatshëm të bënte presidenti ukrainas
Presidenti ukrainas Volodymyr Zelensky ka lënë të kuptohet se një marrëveshje armëpushimi mund të arrihet në luftën me Rusinë nëse territoret ukrainase do të futeshin “nën ombrellën e NATO-s”.
Kjo, sipas tij, do t’i mundësonte atij që të negociojë kthimin e territoreve të mbetura më vonë “në mënyrë diplomatike”.
Është përmendja e parë e Zelensky-t për një marrëveshje që do të përfshinte kontrollin rus të një pjese të territorit ukrainas. Sot Rusia mban rreth 20%-25% të Ukrainës brenda kufijve të saj të njohur ndërkombëtarisht.
Deri më sot, Zelensky ka këmbëngulur se nuk do t’i dorëzojë kurrë territoret e pushtuara Rusisë dhe as Krimenë, të cilën Rusia e ka pushtuar që nga shkurti i vitit 2014. Siç shpjegoi ai, kjo nuk lejohet nga Kushtetuta e Ukrainës dhe se e vetmja mënyrë për ta bërë këtë është të bien dakord që banorët e rajoneve të shkëputen.
Në një intervistë me Sky News dhe Stewart Ramsey, presidentit ukrainas iu kërkua t’i përgjigjet raporteve të mediave se një nga planet e presidentit të zgjedhur të SHBA-së, Donald Trump për t’i dhënë fund luftës mund të ishte që Kievi t’i lëshonte Rusisë territoret që Moska ka marrë në shkëmbim të anëtarësimit të Ukrainës në NATO.
Zelensky u përgjigj se anëtarësimi në NATO duhet t’u ofrohet pjesëve të lira të vendit për t’i dhënë fund “fazës së nxehtë të luftës”, për sa kohë që ftesa e NATO-s njihte kufijtë e njohur ndërkombëtarisht të Ukrainës.
Ai madje u duk, siç komenton Sky News, të pranonte se pjesët lindore të vendit të pushtuara nga Rusia do të liheshin për momentin jashtë një marrëveshjeje të tillë.
“Nëse duam të ndalojmë fazën e nxehtë të luftës, duhet të fusim nën ombrellën e NATO-s territorin e Ukrainës që kemi nën kontrollin tonë”, tha ai për rrjetin britanik. Ai shtoi se “duhet ta bëjmë shpejt. Dhe pastaj territoret [të pushtuara] të Ukrainës, Ukraina mund t’i marrin ato përsëri diplomatikisht.”
Sipas liderit ukrainas, armëpushimi është i nevojshëm “për të garantuar se Vladimir Putin nuk do të kthehet” për të kapur më shumë territor ukrainas.
Ai madje i kërkoi NATO-s që të “mbulojë menjëherë” pjesën e Ukrainës që mbetet nën kontrollin e Kievit. Për këtë, vazhdoi presidenti ukrainas, vendi i tij ka nevojë “shumë”, përndryshe presidenti rus “do të kthehet”.
Në pyetjen e Sky drejtuar Zelensky-t në lidhje me Presidentin e zgjedhur Trump, presidenti ukrainas tha se “unë dua të punoj me të drejtpërdrejt sepse ka zëra të ndryshëm nga njerëzit përreth tij. Dhe kjo është arsyeja pse ne nuk duhet të lejojmë askënd përreth të shkatërrojë komunikimin tonë.”
Ai shtoi se “kjo nuk do të jetë e dobishme dhe do të jetë shkatërruese. Duhet të përpiqemi të gjejmë modelin e ri. Dua të ndaj ide me të dhe dua ta dëgjoj”.
Për diskutimin që kishin shtatorin e kaluar, Volodymyr Zelensky tha se ishte “shumë i ngrohtë, i mirë, konstruktiv, një takim shumë i mirë dhe një hap i parë i rëndësishëm. Tani duhet të përgatisim disa takime”. /tesheshi.com/
