Ndoshta kujdo do t’i ket bër përshtypje, fotot nërpër rrjete sociale të disa prej futbollistëve të kombëtares por edhe kampionatit vendas, teksa shprehin me gjeste hapur besimin e tyre, në shumicë muslimane. Imami i xhamisë “Dine Hoxha”, apo sic njihet më së shumti, xhamisë së Rrugës së Kavajës, Ahmet Kalaja, gjithmonë është personi që i shoqëron këta futbollist në faljet e tyre, por me sa duket edhe në momente të tjera private.
Në rrëfimin e tij për rubrikën “Exclusiv” të shfaqur në Top Channel, Imami Kalaja foli gjatë për lidhjet me futbollistët. “I kam njohur për shkak të pozitës time si Imam i kësaj xhamie, ku shumë futbollist vijnë të falen. Kemi krijuar shumë miqësi me ta, janë djem të kompletuar nga ana intelektuale, fizike dhe atyre i ka mbetur tashmë përmbushja shpirtërore që me sa duket e kanë gjetur tek feja, tek besimi në Zot,” – thotë Imami Kalaja.
Këtë gjë e konfirmon edhe lojtari i përfaqësueses Jahmir Hyka: “Kam filluar të vij në xhami që në moshën 13-vjecare dhe ndihem shumë mirë me besimin që kam dhe nuk e fsheh asnjëherë ta shfaq dhe nuk do ta bëja kurrë.” Me të njëjtën krenari e shpreh edhe mborjtësi i kombëtares Mërgim Mavraj: “Mua nuk më pengon aspak feja ime, përkundrazi e kam për krenari dhe vëllezërit e motrat e mi më kanë përkrahur e mbështetur, pavarësisht nëse kanë qenë musliman apo jo.”
Ndërkohë që jo rrall herë kanë patur impakt të zhurmshëm shfaqet në publik të gjesteve të besimit të lojtarëve, apo vendimet e tyre. I tilli ishte momenti kur pikërisht, lojtari i kombëtares Mërgim Mavraj, refuzoi fanellën e stërvitjes me reklamë një pije alkolike, apo vendimi për të mos agjëruar gjatë muajit të Ramazanit që përkoi me periudhën e pjesmarrjes sonë në Europian. “Edhe pse lojtaret donin te agjeronin duke u shprehur se ndihen me mire agjerueshëm, i këshillova të mos e bënin sepse nëse do të ndodhte dicka do ja vinin fajin agjerimit. Kjo gjë ndodh me mediat tona, kryesisht ato kosovare të cilat shpesh janë marrë me këto ngjarje duke i vënë në diskutim edhe besimin,” – shton Imami Kalaja që theksoi se djemt e kombëtares por edhe të klubeve të ndryshme janë të qartë për ekstremizmin. “Shpesh herë media keqinformon me gjërat që publikon, për cdo shpërthim thonë ja muslimanët, por e vërteta është krejt ndryshe. Ne feja jonë na mëson shumë se si të sillemi me njerëzit, jo vetëm ata që njohim dhe jo vetëm ata të fes tonë por edhe të feve të tjera që ti respektojm,” – shton zv.kapiteni i Tiranës Gentian Muca.
“Këta janë djem të lexuar dhe e kanë bërë prej kohësh dallimin mes Islamit real dhe atij të ashtuquajtur radikal. Të jesh musliman i mirë do të thotë të respektosh të tjerët e të sillesh mirë në shoqëri e familje. Djemtë nuk kanë patur asnjëherë paqartësira të tilla, atë për të cilën ata interesohen janë rastet për bamirësi. Pyesin shpesh nëse ka familje apo fëmijë që ë mund t’i ndihmojnë, janë kontribues të rregullt,” – përfundon Kalaja.
Video e reportazhit te pergatitur nga gazetari Endi Tufa
