Zëdhënësja e UNHCR-së, Vivian Tan, deklaroi se numri i të larguarve në Bangladeshin fqinj vazhdimisht rritet
COX’S BAZAR (AA) – Sipas të dhënave më të reja të UNHCR-së, territorin e Mianmarit nga 25 gushti deri më sot e kanë braktisur rreth 290.000 muslimanë Rohingya, raporton Anadolu Agency (AA).
Zëdhënësja e UNHCR-së, Vivian Tan, deklaroi se numri i të larguarve në Bangladeshin fqinj vazhdimisht rritet.
Bëhet e ditur se kampet e përkohshme për vendosjen e tyre “janë më se të stërmbushura”, ndërsa refugjatët e sapoarritur në mënyrë spontane formojnë vendbanime afër rrugëve ose në një parcelë tokë të qasshme.
Ajo paralajmëroi se ekziston nevojë urgjente për ndërtimin e kampeve të reja të përkohshme për vendosjen e refugjatëve. Gjithashtu paralajmëroi se vendbanimet që i formojnë refugjatët nuk mjaftojnë që njerëzit të qëndrojnë një kohë të gjatë.
Kombet e Bashkuara kërkojnë nga autoritetet e Bangladeshit që të sigurojnë më shumë parcela në të cilat do të mund të formohen kampe për ndihmë të refugjatëve të Arakanit.
