Kjo tortë është me të vërtetë një nga ëmbëlsirat më të mira e më të forta. Duket e vështirë, por është një recetë e thjeshtë që nuk ka nevojë as të piqet në furrë. është një lloj cheescake e në bazë të kësaj torte është gjalpi i kikirikut që përdoret shumë në Amerikë.*
Përbërësit për Tortë me gjalpe kikiriku dhe çokollatë
250 gr biskota me çokollatë
100 gr gjalpë
1+1/2 filxhanme gjalpë kikiriku
300 gr krem djathi (maskarpone)
1/2 filxhanme sheqer
100 gr pana
Për pjesën sipër :
3 lugë çokollatë të shkrirë
3 lugë gjalpë kikiriku
Përgatitja :
Marrim biskotat me çokollatë dhe i shtypim ose i grijmë me grirësin elektrik. Më pas i shtojmë dhe gjalpin e shkrirë. I trazojmë mirë bashkë.
Në një tavë të rrumbullakët shtrojmë letër kuzhine dhe hedhim në të masën e përgatitur. E shtypim mirë me dorë ose me lugë. Vendosim tavën në frigorifer përreth gjysmë ore.
Ndërkohë, në një enë qelqi hedhim maskarponen, sheqerin dhe 1 filxhan gjalpë e kikirikut. Fillojmë ti rrahim derisa të arrijmë një masë të fryrë. Në një enë tjetër hedhim panën, e rrahim me rrahësin elektrik derisa të fryhet.
Bashkojmë panën e rrahur me përbërësit e enës tjetër. Duhet të kemi kujdes që ti trazojmë nga poshtë lart në mënyrë që masa të mos shfryhet.
Marrim tavën nga frigoriferi dhe hedhim sipër masën e përgatitur. E nivelojmë mirë e me kujdes me lugë. Sipër e lyejmë të gjithë tortën me një shtresë gjalpë kikiriku,(1/2 e filxhanit që na ka mbetur).
Vendosim tortën në frigorifer për disa orë.
Në momentin që do ta shërbejmë nxjerrim tortën nga frigoriferi dhe i hedhim sipër çokollatën e shkrirë dhe me ndihmën e një xhepi pastiçier bëjmë edhe disa vija me çokollatë të ndërthurura së bashku me disa vija me gjalpë kikiriku. Torta është gati për tu servirur. Të gjithë të ftuarit tuaj do të mbeten të kënaqur nga kjo ëmbëlsirë./tryeza
1. Maskarpone ka përkthimin në shqip – djathë i bardhë i lyrshëm.
Ky lloj djathi është tipik i zonës së Lombardisë ( më saktësisht zona e Lodit). Eshtë i njohur nga Ministria e Politikës Agrare si prodhim agroalimentar tradicionalisht italian.
Maskarpone është një djathë i veçantë që dallohet nga të tjerët sepse është i prodhuar nga kremi i qumështit. Ka pamjen e një kremi të butë, konsistent, me ngjyrë të bardhë në të verdhë, me një shije të ëmbël dhe ka shumë kalori. Ky lloj djathi duhet të konsumohet i freskët. Gjen një përdorim të gjerë si në receta të kripura edhe në ato të ëmbla. Maskarpone është përbërësi kryesor i tiramisu-së.
Në recetat tona këtë lloj djathi e gjeni gjtihmonë me emrin “Kremi maskarpone” sepse duke qenë një produkt karakteristik italian nuk gjen një përkthim të mirëfilltë në gjuhët e huaja dhe njihet në mbarë botën me këtë emër.
2. Pana ka përkthimin në shqip – ajkë ose mazë.
Por shumë nga ne mund të ngatërrohen me këtë përkthim. Eshtë e vërtetë që pana është pjesa e ajkës së qumështit, por nuk mund ta marrim në kushtet e shtëpisë duke zier thjesht qumështin.
Pana është një nënprodukt i qumështit që karakterizohet nga përmbajtja e madhe e yndyrës. Ajo nxirret nga qumështi me një proçes centrifugimi që ndan molekulat e yndyrës nga pjesa tjetër e lëngshme e qumështit. Në një litër qumësht nxirret rreth 35 gramë yndyrë.
Pana gjen një përdorim të gjerë në kuzhinë. Ekziston pana e freskët e cila ka një skadencë të shkurtër. Mund ta përdorim si për receta të ëmbla ashtu dhe për ato të kripurat. Kur e rrahim me rrahësin elektrik, bëhet si shkumë dhe e përdorim për ëmbëlsira të ndryshme. Këtë lloj pane mund ta përdorim edhe pa e rrahur duke e shtuar në shumë salca për makarona e jo vetëm.
Ekziston pastaj edhe pana e kuzhinës që është e konservuar dhe ka një skadencë disa mujore. Këtë lloj pane s’mund ta rrahim me rrahësin elektrik, e përdorimvetëm në receta të kripura.
