Jetët që po merr një epidemi kolere aty ku deri dje ndodhnin masakra
Një shpërthim i kolerës në disa provinca të Sirisë ka marrë jetën e 29 personave, njoftoi sot Ministria e Shëndetësisë e vendit, ku OKB-ja flet për epideminë më të keqe të kësaj sëmundjeje në vend në vite.
338 raste të kolerës janë regjistruar në Siri që kur epidemia u shfaq për herë të parë në vend një muaj më parë, me shumicën e infeksioneve dhe vdekjeve të ndodhura në provincën e Aleppos, vuri në dukje Ministria e Shëndetësisë. Aty janë regjistruar 230 raste dhe 25 vdekje.
OKB-ja tha në fillim të këtij muaji se shpërthimi besohej të ishte për shkak të përdorimit të ujit të kontaminuar për ujitjen e të korrave dhe konsumit të ujit të papërshtatshëm nga lumi Eufrat që kalon nëpër Siri nga veriu në lindje. Sëmundja shumë ngjitëse është përhapur gjithashtu në zonat veriore dhe verilindore të Sirisë të kontrolluara nga kurdët dhe grupet opozitare, ku miliona njerëz të zhvendosur brenda vendit janë strehuar pas më shumë se një dekade lufte.
Rastet e dyshuara të kolerës janë rritur në 2,092 në Sirinë verilindore, tha Komiteti Ndërkombëtar i Shpëtimit (IRC) me bazë në SHBA, i cili vepron atje. Organizata u ankua se rastet e regjistruara zyrtarisht janë shumë më pak se ato reale.
Dëmet e shumta në rrjetin kombëtar të furnizimit me ujë të Sirisë pas viteve të luftës detyrojnë pjesën më të madhe të popullsisë të mbështetet në burime të pasigurta.
Para se të shpërthente kjo epidemi e kolerës, kriza e ujit kishte shkaktuar një rritje të rasteve të diarresë, kequshqyerjes dhe sëmundjeve të lëkurës në Siri, sipas Organizatës Botërore të Shëndetësisë. /tesheshi.com/
