Zveçani e Graçanica, në mesazhet e bijve të nënës Rusi
Dario Ristiç shkoi sërish në një udhëtim jashtë vendit vetëm pak javë pasi u kthye në shtëpi në Modriça, Republika Srpska në Bosnje, nga një mungesë shumëvjeçare në Zvicër. Babai i tij thotë se ai ishte në burg atje. Sot ai ka frikë nëse Dario do të kthehet këtë herë.
Ljubomir Ristiç thotë se në çdo moment pret lajme të këqija për djalin e tij.
“E ndjej se çdo sekondë… pres diçka të keqe (të ndodhë me të)”, thotë ai.
Dhe duket se fqinjët e dinë që Dario shkoi në Rusi. Ljubomir mësoi nga djali i tij i dytë se Dario kishte marrë tashmë nënshtetësinë ruse dhe se ai po planifikonte të vinte së shpejti në Modriça.
Por njoftimet nga Rusia dhe Ukraina flasin për një rikthim të ndryshëm nga ai që shpreson Ljubomir.
Shoku i Darios nga Serbia paraqet planet e tij për t’u kthyer në vendlindje dhe prej tij përmenden vendbanimet serbe në Kosovë.
“Kur të mbarojmë këtu me këta natofashistë, do të vijmë atje të kthejmë gjërat tona të shenjta dhe atë që është e jona. Po na presim njerëzit dhe fëmijët nga Zveçani, nga Graçanica dhe të gjitha vendet tona të shenjta serbe. Ne jemi me ju. Jini të sigurt me ne. Lavdi Zotit, lavdi nënës Rusi, deri në fitore”, thotë ky ushtar serb në frontin ukrainas.
Kjo video është një nga disa që u publikuan në mars të këtij viti në kanalin Telegram “Permian Bears” para se të mbyllej në prill.
Për disa javë, detektori ndoqi postimet dhe rrugëtimin e Dario Ristiçit dhe tani, së bashku me profilet e tij të tjera dhe bisedat me familjen e tij, gazetarët mund të rindërtojnë udhëtimin e tij në vijën e parë të frontit në Ukrainë, ku ai shkel ligjet e Bosnjes që ndalon shkuarjen në fushat e huaja të betejës.
Që kur pushtimi rus i Ukrainës filloi më shumë se dy vjet më parë, ky mbetet një nga rastet jashtëzakonisht të rralla në të cilat është e mundur të zbulohet identiteti i vullnetarëve që luftojnë në anën ruse. /tesheshi.com/
