TIRANË (AA) – Ka mbërritur për një vizitë treditore në Shqipëri, patriarku i Moskës dhe të gjithë Rusisë, Kirill, i cili do të takohet me zyrtarët më të lartë të vendit, raporton Anadolu Agency (AA).
Kryepeshkopi i Kishës Ortodokse të Shqipërisë, Anastas Janullatos, i shoqëruar nga klerikë të tjerë, pritën Patriarkun Kirill në aeroportin ndërkombëtar “Nënë Tereza”.
Më pas vijoi pritja zyrtare në Katedralen “Ngjallja e Krishtit”, në Tiranë, ku u mbajt dhe një meshë për nder të patriarkut Kirill.
Pjesë e ceremonisë së pritjes ishin edhe besimtarë ortodoksë të Shqipërisë, si dhe klerikë.
Aktivitetet dhe ceremonitë për vizitën e Kirril do të vazhdojnë edhe gjatë ditës së nesërme, ku do të jepet edhe një shfaqje festive në Tiranë në Qendrën Kulturore të Kishës Ortodokse.
Me rastin e vizitës së patriarkut Kirill në katedralen “Ngjallja e Krishtit” ishin mbledhur qytetarë dhe besimtarë të shumtë.
Ndërkohë për mbarëvajtjen e ceremonisë së pritjes, Policia e Shqipërisë kishte ndërmarrë një sërë masash sigurie.
Gjatë qëndrimit në Shqipëri, patriarku rus Kirill do të zhvillojë takime të hënën me Presidentin e Shqipërisë, Ilir Meta dhe kryeministrin, Edi Rama.
Kirill do të vizitojë edhe Manastirin e Shën Vlashit Durrës. Kjo është vizita e parë në Shqipëri e patriarkut të Rusisë.
