Numri i trupave nën komandën e NATO-s të vendosura në krahun lindor të aleancës ka arritur në 40,000, gati 10 herë sesa ishte vitin e kaluar.
Sipas të dhënave nga NATO, kishte 4650 trupa nën komandën e drejtpërdrejtë të NATO-s në shkurt të 2021 ose një vit përpara se Rusia të fillonte sulmin e saj kundër Ukrainës.
Këto trupa u vendosën në katër grupe beteje shumëkombëshe të vendosura përkatësisht në Estoni, Letoni, Lituani dhe Poloni, shkruan Euronews, përcjell Telegrafi.
Më pas Rusia filloi vendosjen e trupave dhe aftësive të saj përgjatë kufirit të saj të përbashkët në Ukrainë, duke i përshpejtuar këto lëvizje në fund të vitit të kaluar dhe në janar, duke argumentuar se ishte një lëvizje mbrojtëse mbi aspiratën e Ukrainës në NATO dhe zgjerimin lindor të aleancës transatlantike që nga vitet 1990.
Kështu, NATO dhe 30 anëtarët e saj reaguan ndaj grumbullimit të trupave ruse duke forcuar pozicionet e tyre lindore me më shumë trupa dhe pajisje ushtarake.
Dhe një muaj pas fillimit të agresionit rus në Ukrainë, kishte 40,000 trupa aleate nën komandën e drejtpërdrejtë të NATO-s, me çdo grup beteje ekzistues të forcuar ndjeshëm – Polonia shkoi nga 1,010 trupa në 10,500 – ndërsa katër grupe të reja beteje u krijuan në Sllovaki, Hungari, Rumani dhe Bullgari.
Për më tepër, shumë vende evropiane kanë kërkuar trupa shtesë amerikane në tokën e tyre sipas marrëveshjeve dypalëshe, duke e çuar numrin e përgjithshëm të ushtarëve amerikanë në të gjithë Evropën në rreth 100,000 – niveli më i lartë që nga viti 2005.
Agresioni i Rusisë ka bërë që anëtarët evropianë të NATO-s të zotohen se do të rrisin ndjeshëm shpenzimet e tyre të mbrojtjes në mënyrë që të arrijnë objektivin e aleancës prej 2% të PBB-së.
Anëtarët e NATO-s kanë nisur gjithashtu një “rivendosje” të strategjisë së tyre, duke premtuar se do të forcojnë dislokimet dhe aftësitë në tokë, në det dhe në ajër, edhe më tej. Më shumë detaje mbi këtë strategji do të zbulohen në një samit në qershor.
Për më tepër, dy vende evropiane – Suedia dhe Finlanda – kanë kërkuar zyrtarisht t’i bashkohen aleancës së mbrojtjes, e cila në fakt do të dyfishonte gjatësinë e kufirit të përbashkët të aleancës me Rusinë. /Telegrafi/
