Afrikanët, posaçërisht ata muslimanë, përballen me një diskriminim në rritje në Gjermani për shkak të islamofobisë. Kjo është ajo për çka ngre zërin një grup monitorues i OKB-së.
“Muslimanët me prejardhje afrikane po përballen me kohë gjithnjë e më të vështira në gëzimin e të drejtave të tyre për shkak të islamofobisë dhe afrofobisë,” ka nënvizuar në një konferencë shtypi në Berlin Ricardo Sunga, drejtuesi i grupit të punës të ekspertëve të OKB-së për njerëzit me prejardhje afrikane.
Sipas raportimit të Anadolu Agency, Sunga do të thoshte gjithashtu se, “Shumë studentë muslimanë me prejardhje afrikane e përshkruajnë si dramatike përvojë e tyre në shkollë, ndërsa përballen jo vetëm me racizëm për shkak të ngjyrës, por edhe me racizëm antimusliman.”
Ky grup ekspertësh i OKB-së e vizitoi këtë muaj Gjermaninë për ta parë nga afër gjendjen e të drejtave njerëzore të atyre me prejardhje afrikane që qëndrojnë në këtë vend.
“Femrat muslimane me prejardhje afrikane përballen me diskriminim të mëtejshëm kur bëhet fjalë për të hyrë në tregun e punës,” do të vinte në pah drejtuesi i këtij grupi ekspertësh të OKB-së.
Ai u bëri thirrje autoriteteve gjermane që t’i luftojnë të gjitha format e diskriminimit racor, të ksenofobisë e afrofobisë. /tesheshi.com/
