Në Konventën Ndërkombëtare të Turizmit e cila po mbahet në Tiranë, të martën është paraqitur harta e Kosovës mbi të cilën është vendosur mbishkrimi “Serbia”.
Kjo hartë e cila informon për investimet në disa biznese hotelierie në qytete të ndryshme të Shqipërisë, e paraqet pjesën jugore të territorit të Kosovës brenda kufijve të Serbisë.
Videoja e Konventës ku është paraqitur kjo hartë është shpërndarë nga kryeministri i Shqipërisë, Edi Rama, në llogarinë e tij në Facebook.
Ndryshe, Konventa Ndërkombëtare e Turizmit po mbahet edhe këtë të mërkurë në Pallatin e Kongreseve në Tiranë, ku po marrin pjesë përfaqësues nga 38 vende të botës.
Kjo është hera e parë që Konventa po zhvillohet në Ballkan.
Pjesën ku është paraqitur harta e Kosovës mbi të cilën është vendosur mbishkrimi “Serbia” mund ta shihni nga minuta e 45. /Telegrafi/
