“Kjo është një njollë për komunitetin ndërkombëtar”, ka thënë drejtoresha e Save the Children, Inger Ashing
Afërsisht 200 milionë fëmijë në botë janë në rrezik të bëhen fëmijë ushtarë në zonat më vdekjeprurëse të luftës, transmeton Anadolu Agency (AA).
Në raportin e publikuar nga organizata ndërkombëtare e ndihmës Save the Children, thuhet se në vitin 2020, afër 337 milionë fëmijë ndodheshin në zonat nën kontrollin e grupeve të armatosura dhe forcave qeveritare që rekrutonin fëmijë.
Në raport theksohet se rreth 200 milionë prej tyre jetojnë në zonat më vdekjeprurëse të luftës në botë dhe ky numër është rritur me 20 për qind krahasuar me një vit më parë.
Në raport rekomandohet që autorët e shkeljeve të rënda të mbahen përgjegjës për të ndalur “këtë luftë kundër fëmijëve” dhe për të siguruar që fëmijët të kenë akses në arsim për t’i mbrojtur ata nga rekrutimi i detyruar.
Drejtoresha e Save the Children, Inger Ashing, në deklaratën e saj për këtë temë, tha se pavarësisht pandemisë së koronavirusit të ri (COVID-19) dhe thirrjes globale për armëpushim të Kombeve të Bashkuara, është e tmerrshme që më shumë se kurrë kaq fëmijë jetojnë në zonat më vdekjeprurëse të luftës dhe se këta fëmijë janë në rrezik për t’u rekrutuar, plagosur apo vrarë.
Duke theksuar se miliona fëmijë nuk mund të shkojnë në shkollë dhe nuk mund të shohin asgjë përveç luftës, Ashing tha: “Kjo është një njollë për komunitetin ndërkombëtar”.
