Erdoğan tha se pikat kryesore që do të diskutohen gjatë vizitës në SHBA do të jenë organizatat që përbëjnë kërcënim për sigurinë kombëtare të Turqisë si dhe ekstradimi i kreut të FETO-s
ANKARA (AA) – Presidenti i Turqisë Recep Tayyip Erdoğan sot në Ankara deklaroi se gjatë vizitës në Shtetet e Bashkuara të Amerikës (SHBA) të paralajmëruar për 16 maj, me presidentin amerikan Donald Trump do të bisedojë për ekstradimin e udhëheqësit të organizatës terroriste FETO, Fetullah Gylen, raporton Anadolu Agency (AA).
“Ka informacione dhe dokumente të tjera që do të dorëzohen në lidhje me këtë. E respektoj vullnetin e Trumpit në lidhje me këtë çështje dhe ne në lidhje me këtë kërkesë do të shkojmë deri në fund. Sipas mendimit tim, SHBA-të nuk duhet të jenë fole dhe inkubator i FETO-s”, ka thënë Erdoğan para gazetarëve në Ankara në prag të nisjes për vizitë zyrtare në Kinë.
Erdoğan ka shtuar se pikat kryesore që do të diskutohen gjatë vizitës në SHBA do të jenë organizatat që përbëjnë kërcënim për sigurinë kombëtare të Turqisë, siç janë FETO dhe PYD/YPG, dhe ekstradimi i kreut të FETO-s, Fethullah Gylen, duke shtuar se po ashtu do të bisedohet edhe në lidhje me mundësitë për zhvillimin e bashkëpunimit ekonomik dhe rritjen e tregtisë dhe investimeve reciproke.
Presidenti Erdoğan e ka cilësuar si “gur kilometrik” vizitën e tij që do ta zhvillojë në SHBA në aspektin e marrëdhënieve mes dy shteteve.
Ai rikujtoi se paraprakisht një delegacion kishte zhvilluar takim preliminar në SHBA lidhur me ndihmën amerikane me armë për YPG-në dhe ekstradimin e kreut të FETO-s.
“Delegacioni është kthyer, kurse ne tani duam që takimin ta realizojmë në nivelin më të lartë dhe që çështja të mos mbetet pa u zgjidhur, por të përfundojë”, tha Erdoğan.
Ndryshe, presidenti turk Erdoğan udhëton në Pekin të Kinës për të marrë pjesë në Forumin “Rripi dhe Rruga” që organizohet më 14 dhe 15 maj nën mikpritjen e presidentit të Kinës, Xi Jinping.
