▪️Fjala “Dynja” e ka origjinën te gjuha arabe “Ed-Dun’ja” dhe do te thotë: diçka e ulët në grada.
Kjo fjalë në librin e Allahut përdoret për të treguar për jetën e kësaj bote dhe bukuritë e saj përballë jetës së botës tjetër të Ahiretit dhe përfshin çdo gjë, ose të domosdoshme për të jetuar, ose të qejfit.
Ato të domosdoshmet janë ato jetësoret si: ushqimi, veshja, streha, siguria etj.
Ndërsa ato të qejfit janë si: gratë, fëmijët, pasuritë, postet, fama etj.
▪️Urtësia e Allahut ka bërë që kjo e dyta t’u zbukurohet njerëzve siç thotë Allahu i madhëruar në Kuran:
“U janë zbukuruar njerëzve dashuria për gjërat e qejfit si: gratë, fëmijët, sasitë e mëdha të floririt dhe sermit, kuajt balashë, bagëtitë dhe të mbjellat. Ato janë kënaqësia e Dynjasë dhe tek Allahu ka shpërblim më të mirë se ato” (Surja Ali Imran: 14)
Për këto ka thënë Profeti -alejhi selam-:
“Dynjaja është e ëmbël dhe e bukur dhe Allahu ka për t’jua dhënë atë për të parë se si do të punoni. Prandaj ruajuni Dynjasë!” Transmeton Muslimi )
Përshkrimi i saj me fjalën “E ëmbël” ka lidhje me shijen që të lë kur e provon, ndërsa përshkrimi i saj me fjalën “E bukur” ka lidhje me pamjen kur e sheh dhe të mahnit.
▪️Zbukurimi i Dynjasë e ka kthyer atë në sprovë dhe kështu njeriu e ka të vështirë të shpëtojë prej sprovës së saj, vetëm nëse do të ruaj një farë raporti në lidhje me të dhe ai raport me të sipas mësimeve profetike është:
- Të marrë prej saj atë që është hallall dhe ta fitojë atë hallall, sepse për të ka llogari në botën tjetër.
- Të marrë prej saj aq sa i duhet dhe të mos e teprojë, sepse njeriu në ketë botë është udhëtar dhe nëse do të jepet totalisht pas saj do të mbesë bosh në botën tjetër.
- Ta përdorë atë për të fituar Ahiretin (botën tjetër).
Dr. ABDULLAH NABOLLI
