Ukraina nuk do të lejojë më transitin e gazit rus përmes territorit të vendit pas fundit të këtij viti, ka njoftuar Volodymyr Zelensky pas takimit me liderët e BE-së në Bruksel.
“Ndalimi”, shtoi presidenti ukrainas, “do të zbatohet për çdo rrjedhë gazi që vjen nga Rusia për të shmangur rrezikun e shitjes së gazit rus në Evropë nën maskën e gazit të prodhuar nga Azerbajxhani”.
“Ne nuk do t’i lejojmë ata të fitojnë miliarda shtesë mbi gjakun tonë. Dhe çdo vend në botë që mund të marrë diçka të lirë nga Rusia, përfundimisht do të bëhet i varur nga ajo – qoftë kjo në një muaj apo një vit. Kjo është politika e tyre”, vazhdoi ai.
Deklarata dukej sikur ishte edhe për Robert Ficon, kryeministrin e Sllovakisë, një vend pa dalje në det që mbetet shumë i varur nga gazi rus.
Bëhet e ditur se Sllovakia importon tre miliardë metra kub nga Gazpromi çdo vit, duke mbuluar pjesën më të madhe të kërkesës së saj të brendshme.
Me afrimin e fundit të transitit, Sllovakia ka rritur përpjekjet diplomatike për të siguruar që flukset e energjisë të vendit të mos ndërpriten, shkruan euronews, përcjell Telegrafi.
Si një alternativë, Bratislava mund t’i drejtohet Azerbajxhanit, një vend i vogël në Kaukaz që e ka pozicionuar veten si një opsion i përballueshëm për Evropën për të zëvendësuar gazin rus.
Megjithatë, marrëveshjet me Azerbajxhanin janë të diskutueshme për shkak të historisë së dobët të të drejtave të njeriut në vend.
Sipas skemës, shpjegon Bruegel, Rusia do të furnizonte Ukrainën me gaz të etiketuar si “gaz azerbajxhanas” ndërsa Azerbajxhani do të blinte gaz nga Rusia.
“Me fjalë të thjeshta, nuk do të kishte asnjë ndryshim në rrjedhat e gazit: tregtarët e BE-së do të blinin gaz nga Azerbajxhani, i cili do të blinte gaz nga Rusia”, shkroi Bruegel në një studim.
Por Zelensky e bëri të qartë se nuk do të toleronte një operacion të tillë mashtrues, duke argumentuar se Kremlini do të fitonte ende para dhe, si rezultat, do të ruante një burim kyç të të ardhurave për të financuar pushtimin e tij të kushtueshëm dhe brutal.
Ndryshe, lajmi pritet të përkeqësojë më tej lidhjet midis Kievit dhe Bratislavës.
Zelensky dhe Fico kanë pasur marrëdhënie të tensionuara që kur populisti sllovak u kthye në pushtet në tetor të vitit të kaluar.
Fico është rreshtuar gradualisht me Viktor Orbanin e Hungarisë për të marrë një qëndrim thellësisht skeptik për mbështetjen ushtarake për Ukrainën.
“Ukraina nuk do të ftohet në NATO. Ajo do të humbasë një të tretën e territorit të saj. Atje do të ketë forca të huaja ushtarake”, tha Fico një ditë përpara samitit në Bruksel.
Raportohet se Sllovakia është në kontakt me qeverinë ukrainase dhe me Komisionin Evropian, i cili mbron heqjen e plotë të gazit rus, për të gjetur një zgjidhje përpara se të përfundojë marrëveshja e transitit midis Ukrainës dhe Gazprom.
Ndalimi mund të prekë edhe Austrinë dhe Hungarinë, megjithëse në një masë të ndryshme. /Telegrafi/
