Të tjera detaje kanë dalë në dritë rreth sulmit të kryer në redaksinë e gazetës “Capital Gazette” në Merilend, ku mbetën të vrarë 5 persona dhe dy të tjerë u plagosën.
Autori i ngjarjes është identifikuar si Jarrod W. Ramos, 38 vjeç. Dyshohet se ai e kreu sulmin në shenjë hakmarrje pasi gazeta kishte publikuar fotot e tij për një rast përndjekje.
Agresori e kishte hedhur në gjyq për shpifje gazetën në vitin 2012, por doli i humbur, kështu që kishte vendosur të hakmerrej vetë. Ai kishte postuar një sërë deklaratash kritike në “Twitter” ndaj gazetës përgjatë këtyre viteve.
Ai i drejtohet gazetarit Eric Thomas Hartley me fjalët: “…oh thjesht vrit viten para se unë ta bëj (ligjërisht në gjykat”, shkruante autori në një tweet në vitin 2014.
Mediat amerikane raportojnë se ai ka qenë i armatosur me armë gjahu dhe granata kur nisi sulmin në redaksi.
Policia ia doli të identifikojë autorin duke përdorur teknologjinë e njohjes së fytyrës pasi ai kishte dëmtuar qëllimisht shenjat e gishtave. Uniformat ndërhynë në ndërtesën e tij në Laurel të Merliendit dhe me gjithë rezistencën e vunë në pranga.
Të pesë viktimat u identifikuan si Wendi Winters, 65 vjeç, Rebecca Smith, 34 vjeç, Robert Hiaasen, 59 vjeç, Gerald Fischman, 61 vjeç dhe John McNamara, 56 vjeç.
