Sipas Tel Aviv-it, e paqartë se kush e qëlloi Shireen Abu Akleh
Shefi i ushtrisë izraelite ka mohuar pretendimet e mëparshme se gazetarja e Al Jazeera-s, Shireen Abu Akleh, e cila u vra të mërkurën ndërsa raportonte gjatë një operacioni izraelit në një kamp refugjatësh në Jenin, në Bregun Perëndimor të pushtuar, mund të jetë goditur nga plumbat qorr të qëlluar nga palestinezët.
Gjenerali Aviv Kochavi tha se ishte e paqartë se kush e qëlloi të shtënën që vrau Shireen Abu Akleh, në një ngjarje që shkaktoi reagime të ashpra nga bota.
“Kjo është e vërtetë. Ne vajtojmë vdekjen e saj”, tha ai, sipas raportimeve të mediave.
Video e diskutueshme izraelite
Ushtria izraelite publikoi të mërkurën një video që tregon palestinezët duke qëlluar në një rrugicë në një kamp në Jenin, duke vënë në dukje se pamjet duhet të përforcojnë pretendimin e saj se palestinezë të armatosur po qëllonin në zonë në atë kohë.
Kryeministri izraelit Naftali Bennett postoi në Twitter një video me qëllimin për të treguar luftëtarët palestinezë të armatosur, të cilët sipas tij qëlluan mbi një ushtar.
Duke qenë se asnjë pjesëtar i forcave izraelite nuk u lëndua të mërkurën, ai tha se kjo çon në përfundimin se luftëtarët palestinezë qëlluan gazetarin.
“Sipas të dhënave që disponojmë, ka një shans të madh që palestinezët e armatosur, të cilët kanë qëlluar rastësisht, të jenë përgjegjës për vdekjen e gazetares”, shkroi ai.
Por grupi izraelit i të drejtave të njeriut B’Tselem kreu hetimin e vet mbi akuzat dhe publikoi një video të mërkurën duke vënë në pikëpyetje pretendimet e ushtrisë izraelite.
Ata gjetën vendndodhjen nga pamjet e ushtrisë izraelite, si dhe vendin ku u vra Shireen Abi Akleh.
“Zjarri palestinez i ‘ndarë’ nga ushtria izraelite nuk mund të jetë zjarri nga i cili u vra Shireen Abu Akleh”, shkroi organizata në Twitter, duke vënë në dukje se dy lokacionet ishin rreth 300 metra larg njëri-tjetrit.
Ministri izraelit i Mbrojtjes Benny Gantz tha të mërkurën se “një hetim paraprak nga ushtria izraelite tregon se nuk ka pasur të shtëna të drejtuara ndaj gazetares, por se ajo po vazhdon”.
Gazeta izraelite Haaretz raportoi se hetimi fillestar për vrasjen tregoi se Shireen Abu Akleh ishte 150 metra nga forcat izraelite në kohën e sulmit dhe se, sipas hetimeve, “nuk është ende e qartë” nëse ajo u vra nga izraelitë ose zjarri palestinez. /tesheshi.com/
