Euro nuk është ndalur as në fund të kësaj jave, duke e mbyllur marshimin në kuotën e 110.58 lekëve, 1.5 pikë më shumë ndaj monedhës tonë kombëtare brenda 24 orëve dhe plot 4.6 pikë më shumë se ditën e hënë.
Me këtë kapërcim, valuta evropian rikthehet atje ku ishte menjëherë pas zgjedhjeve të majit. Megjithatë, pas publikimit të kursit zyrtar, pikat e këmbimit regjistruan një rënie të lehtë të euros, një sinjal se niveli 110 mund të jetë stabiliteti i ri për vazhdimin e vitit.
Ndërkohë, rritjen më të fortë të ditës e regjistroi dollari amerikan, në 102.44 lekë, ndjekur nga paundi britanik me 128.98 lekë dhe franga zvicerane me 115.70 lekë.
Teksa forcimi i kësaj jave vjen si lajm pozitiv për eksportuesit dhe familjet që presin para nga emigrantët, mbetet për t’u parë se çfarë ndikimi do të ketë tek çmimet dhe inflacioni. /Telegrafi/
