Një ushtar i ushtrisë amerikane nga Teksasi është akuzuar për shitjen e të dhënave konfidenciale telefonike, duke përfshirë materiale që dyshohet se janë vjedhur nga presidenti i sapozgjedhur Donald Trump dhe nënpresidentja Kamala Harris, thonë mediat lokale.
Cameron John Wagenius, i vendosur në Fort Cavazos në Killeen, Teksas, u padit nga një juri e madhe në Seattle për dy akuza për krime në fillim të këtij muaji, raportoi “New York Post”.
Ai akuzohet për transferimin e paligjshëm të të dhënave konfidenciale telefonike në një forum online dhe një platformë komunikimi.
Një profil në internet i lidhur me Wageniusin dyshohet se ka qenë i lidhur me disa krime kibernetike të profilit të lartë, të cilat nuk janë të detajuara në aktakuzë.
Duke përdorur pseudonimin “Kiberphant0m”, 20-vjeçari thuhet se ka pretenduar të ketë hakeruar mbi dhjetë firma telekomunikacioni.
Në nëntor, ai ka postuar regjistrat e thirrjeve të paverifikuara të “AT&T” që supozohet se ishin të lidhura me dy kandidatët presidencialë të vitit 2024 dhe ka ofruar të dhënat për shitje, raporton “The Verge”.
/trt BALLKAN /
