“Sa fëmijë të tjerë do të vriten në Gaza ose do të pësojnë vuajtje të papërshkrueshme para se të përfundojë makthi?”, tha drejtoresha ekzekutive e agjencisë, Catherine Russell
Fondi i Kombeve të Bashkuara për Fëmijët (UNICEF) nënvizoi familjet e rëna në Gaza nga lufta e Izraelit, duke e përshkruar sulmin ajror të fundit izraelit që vrau binjakët katërditorë dhe nënën e tyre si “zemërthyese”, transmeton Anadolu.
“Sa fëmijë të tjerë do të vriten në Gaza ose do të pësojnë vuajtje të papërshkrueshme para se të përfundojë makthi?”, tha drejtoresha ekzekutive e agjencisë, Catherine Russell, në një postim në X.
Duke përmendur rastin e së martës me binjakët, të cilët u vranë teksa babai i tyre, Mohammad Abu al-Qumsan, kishte shkuar për të marrë certifikatat e tyre të lindjes, Russell tha: “Ishte zemërthyese kur dëgjova se binjakë të porsalindur dhe nëna e tyre ishin ndër viktimat e fundit”.
“Ka kaluar koha për një armëpushim dhe për lirimin pa kushte të pengjeve”, shtoi ajo.
Sulmi ishte pjesë e ofensivës së vazhdueshme të Izraelit në Rripin e Gazës, e cila ka vrarë mbi 40.000 njerëz që nga 7 tetori i vitit të kaluar.
Më shumë se dhjetë muaj pas fillimit të sulmeve izraelite, pjesë të mëdha të Gazës qëndrojnë në gërmadha, krahas një bllokade paralizuese të ushqimit, ujit të pastër dhe ilaçeve.
Izraeli akuzohet për gjenocid në Gjykatën Ndërkombëtare të Drejtësisë, e cila e ka urdhëruar atë që të ndalojë menjëherë operacionin e tij ushtarak në qytetin jugor Rafah, ku më shumë se një milion palestinezë kishin kërkuar strehim nga lufta përpara se të pushtohej më 6 maj.
/AA/
