Ç’thuhet nga koalicioni kundrapeshë ndaj Perëndimit
Përveç Argjentinës dhe Iranit, të cilat tashmë kanë shpallur synimin e tyre për t’u bashkuar me BRICS, tre vende të tjera po përgatiten të paraqesin një kërkesë për t’u bashkuar me koalicionin e fuqive ekonomike në zhvillim, raporton një gazetë ruse.
Sipas Isvestia, duke cituar një zyrtar të lartë me njohuri për procesin, Princi i Kurorës Mohammed bin Salman po “konsideron seriozisht t’i bashkohet” koalicionit, i cili shihet si një kundërpeshë e fortë ndaj Perëndimit. Çështja e anëtarësimit të vendit të tij në BRICS u diskutua edhe në samitin e BRICS (Brazili, Rusia, India, Kina dhe Afrika e Jugut) të mbajtur në fund të qershorit në Pekin.
Turqia dhe Egjipti kanë treguar gjithashtu interes për BRICS, vuri në dukje gazeta ruse, duke shtuar megjithatë se çështja e anëtarësimit të tyre eventual nuk ishte në tryezë në samitin e fundit.
Informacioni për përfshirjen e mundshme të vendeve të lartpërmendura në koalicion është konfirmuar nga Poornima Anand, presidente e Forumit Ndërkombëtar BRICS. Anand e quajti zgjerimin e mundshëm një hap pozitiv që ka të ngjarë të rrisë ndikimin e koalicionit globalisht.
Ministria e Punëve të Jashtme ruse konfirmoi për Izvestia se në seancën e fundit u vendos që të nisin diskutimet për procesin e zgjerimit të BRICS, ku do të përfshihen edhe kriteret e anëtarësimit të vendeve në fjalë.
“Pasi të arrihet një marrëveshje mbi këto çështje, të pesë anëtarët duhet të vendosin se kur të fillojnë diskutimet për kandidatët individualë,” tha përfaqësuesi i BRICS i Rusisë, Pavel Knyazev.
I pyetur për mundësinë e anëtarësimit të Turqisë, Egjiptit dhe Arabisë Saudite, diplomati vuri në dukje se Rusia e sheh pozitivisht interesin e të gjitha vendeve, megjithatë është ende herët për të folur për orarin e një pranimi pasi nuk janë bërë njoftime zyrtare dhe kriteret.
“Tani për tani ne e dimë se disa vende kanë shprehur interesin e tyre dhe ne e mirëpresim këtë. Gjithçka do të varet se kur do të shpallet zyrtarisht ky interes dhe kur do të biem dakord për kriteret”. /tesheshil.com/
