Ndërsa trazirat vazhdojnë të tërbohen në Mbretërinë e Bashkuar, ekstremistët e djathtë u kanë vënë flakën hoteleve ku strehohen azilkërkuesit.
Hotelit Holiday Inn Express në Tamworth, në Anglinë veriore, iu vu zjarri. Ekstremistët u mblodhën gjithashtu pranë hotelit Holiday Inn Express, i cili përdorej për të strehuar azilkërkuesit në Rotherham. Të dy sulmet ndodhën të dielën.
Protestat e udhëhequra nga grupet e ekstremit të djathtë janë përshkallëzuar në përleshje me policinë në disa qytete, ndërsa një valë trazirash, e nxitur nga ksenofobia dhe keqinformimi për vrasjen tragjike të tre vajzave, po përfshin vendin. Rreth 400 persona janë arrestuar deri më tani.
“Unë garantoj se do të pendoheni që keni marrë pjesë në këtë, qoftë drejtpërdrejt ose duke e nxitur atë në internet,” tha kryeministri britanik Keir Starmer në një fjalim televiziv. Ai i përshkroi trazirat si “grupe të paligjshme të organizuara” nga një pakicë britanikësh.
Në ditën e gjashtë të dhunës, Starmer mbajti një mbledhje urgjente të kabinetit në Downing Street.
Çfarë çoi në këtë situatë?
Javën e kaluar gjatë një seminari kërcimi dhe yoga me temën e Taylor Swift në një qendër komunitare në Southport, pak jashtë Liverpool-it, i dyshuari 17-vjeçar Axel Rudakubana goditi me thikë për vdekje tre vajza. Ai lindi në Cardiff, kryeqyteti i Uellsit, thuhet se nga prindër të krishterë ruandazë.
Por një informacion i rremë në mediat sociale pretendonte se i dyshuari ishte një emigrant musliman.
Dhe ata që u rebeluan njihen të zëshëm për urrejtjen e tyre ndaj emigrantëve. Megjithatë, ka gjithashtu një ndjenjë të ksenofobisë së rrënjosur kundër komuniteteve pakicë në MB, veçanërisht ndaj muslimanëve, thonë analistët.
Rosa Freedman, një profesore në Universitetin Reading, i tha Al Jazeera-s se trazirat ishin rezultat i bashkëpunimit të ish-qeverisë konservatore me grupet “raciste” të së djathtës ekstreme.
“Në vend që të fshehin fytyrat e tyre, ata tani po dalin […] Ne nuk mund të fajësojmë Partinë Laburiste e cila ka qenë në qeveri [vetëm] për katër javët e fundit,” tha ajo.
Ndërkohë, agjitatorët si Tommy Robinson po nxisin tensionet.
I linduri si Stephen Christopher Yaxley-Lennon, aktivisti i së djathtës ekstreme dhe bashkëthemeluesi i Lidhjes Angleze të Mbrojtjes (EDL) ka qenë i zënë me postimin e videove nxitëse për 800,000 ndjekësit e tij në platformën X në të cilat ai akuzon muslimanët, emigrantët, establishmentin politik dhe Policinë.
Këtë e bën, siç thuhet, nga Qiproja. Një gjykatës i Gjykatës së Lartë lëshoi urdhrin për arrestimin e Robinson pasi ai nuk u paraqit në Gjykatën Mbretërore të Drejtësisë të hënën për një seancë dëgjimore në një çështje që humbi për fyerjen e refugjatit sirian Jamal Hijazi.
Ku po ndodhin trazirat?
Përveç Southport, Rotherham dhe Tamëorth, përplasje pati edhe në Manchester, Liverpool, Belfast në Irlandën e Veriut dhe qytete të tjera.
Në rrjetet sociale po qarkullojnë postime që përshkruajnë veprime të tjera të planifikuara të së djathtës ekstreme.
Çfarë tha qeveria?
Kryeministri Starmer tha se ai “thellësisht” dënon “dhunën e krahut të djathtë ekstrem”.
Sekretarja e Brendshme Yvette Cooper tha në një intervistë të fundit me Sky News: “Do të ketë njerëz që menduan se do të shkonin në pushimet e tyre verore këtë javë, por në vend të kësaj ata do të përballen me Policinë në derë”.
Nigel Farage, lideri kundër imigracionit i lëvizjes populiste të Reformës në Mbretërinë e Bashkuar, i cili tani është deputet, nxiti tensionet. Ishte ai që në maj do deklaronte se muslimanët nuk ndajnë vlerat britanike.
“Ajo që patë në rrugët e Hartlepool, Londrës apo Southport nuk është asgjë në krahasim me atë që mund të ndodhë gjatë javëve të ardhshme,” tha Farage së fundmi.
Ai arsyetoi edhe trazirat, duke thënë se “e djathta ekstreme është një reagim ndaj frikës dhe shqetësimit të përbashkët nga dhjetëra miliona njerëz atje”.
Neil Basu, ish-kreu i policisë kundër terrorizmit të Britanisë, akuzoi Farage se nuk ka shkuar aq larg sa duhet në dënimin e dhunës.
“A e dënoi Nigel Farage dhunën? A e dënoi ai EDL? Nxitja e mosmarrëveshjeve në shoqëri është ajo për të cilën këta njerëz duket se ekzistojnë”, tha Basu.
Ministrja e policisë Diana Johnson premtoi pasoja dhe veprime kundër atyre që janë përgjegjës për trazirat dhe dhunën në rrugë.
“Kur pashë njerëz që plaçkisnin disa nga dyqanet në qendër të qytetit […] nuk ka të bëjë fare me një protestë të vërtetë apo me njerëz që kanë mendime të ndryshme për imigracionin,” tha Johnson.
Ç’pritet më tej?
Policia dhe zyrtarët i thonë publikut se autorët e dhunës dhe abuzimit do të ndëshkohen.
Në një konferencë të fundit për shtyp, ndihmës shefi i policisë Lindsey Butterfield tha: “Ne do t’ju gjejmë dhe ju do të mbani përgjegjësi për dhunën”.
Anëtarja laburiste, Diane Abbott, shkroi në Platformën X: “Trazirat kundër emigrantëve në të gjithë vendin në një shkallë të paprecedentë. Kërcënim për jetën, pronën dhe Policinë tonë”.
Sara Khan, një këshilltare e pavarur për vlerësimin e kohezionit social dhe qëndrueshmërisë ndaj ekstremizmit, i tha Guardian se “ekstremizmi dhe kërcënimet ndaj kohezionit po përkeqësohen”.
“Vendi ynë është tmerrësisht i papërgatitur”, tha ajo. “Ne kemi një boshllëk në legjislacionin tonë që i lejon këta ekstremistë të veprojnë pa u ndëshkuar.” /tesheshi.com/
