Presidenti Meta gjatë takimit vlerësoi marrëdhëniet midis dy vendeve, duke i konsideruar të shkëlqyera dhe shprehu mirënjohjen për ndihmën dhe mbështetjen që Turqia i ka dhënë Shqipërisë dhe shqiptarëve
Presidenti I Shqipërisë, Ilir Meta dhe ministri i Jashtëm i Turqisë, Mevlüt Çavuşoğlu, realizuan një takim në selinë e Presidencës së Shqipërisë, ndërsa në fokus të diskutimeve ishte bashkëpunimi mes dy vendeve dhe zhvillimet në rajon, raporton Anadolu Agency (AA).
Presidenti Meta vlerësoi marrëdhëniet midis dy vendeve, duke i konsideruar të shkëlqyera dhe shprehu mirënjohjen për ndihmën dhe mbështetjen që Turqia i ka dhënë Shqipërisë dhe shqiptarëve, veçanërisht në tre dekadat e fundit, theksohet në njoftimin nga Presidenca e Shqipërisë.
“Duke u ndalur tek mundësitë e mëdha të bashkëpunimit ekonomik, presidenti Meta shprehu vlerësimin për vëmendjen që Presidenti Erdoğan dhe Qeveria e Turqisë i kushtojnë këtij bashkëpunimi me Shqipërinë dhe nënvizoi se Turqia mbetet një nga partnerët kryesorë ekonomik e tregtar për Shqipërinë. Presidenti Meta vlerësoi gjithashtu kontributin e dhënë nga Turqia përmes Agjencisë Turke për Bashkëpunim dhe Koordinim (TIKA), e cila tashmë është e pranishme në të gjithë Shqipërinë”, thuhet në njoftim.
Theksohet se Çavuşoğlu dhe Meta i kushtuan një vëmendje të veçantë zhvillimeve më të fundit në rajonin e Ballkanit dhe nevojës për të vijuar kontributin e përbashkët në ruajtjen dhe forcimin e paqes dhe të stabilitetit në këtë rajon.
Presidenti Meta gjatë takimit vlerësoi mbështetjen që Turqia ka dhënë për njohjen e pavarësisë dhe anëtarësimin e Kosovës në organizatat rajonale dhe ato ndërkombëtare, si dhe rolin që ai e konsideroi të jashtëzakonshëm që luan Turqia në përballimin e krizës humanitare të refugjatëve sirianë dhe vendeve të tjera të Lindjes së Mesme në konflikt.
