Situata e tendosur në Lindjen e Mesme pas shkuarjes atje të “USS Gerald R. Ford”
Zhvillimi i shpejtë i ngjarjeve në skenën palestineze ka bërë që ekspertë të shumtë të çështjeve ushtarake dhe strategjike të mos përjashtojnë skenarin e ndërhyrjes ushtarake të SHBA-së, në një mënyrë apo në një tjetër.
Pentagoni ka çuar aeroplanmbajtësen “USS Gerald R. Ford” në Mesdheun Lindor. Në të njëjtën kohë, Shtëpia e Bardhë konfirmoi se 11 amerikanë kanë humbur jetën deri më tani dhe se beson se krahu ushtarak i lëvizjes Hamas, Brigadat e Martirëve Izz al-Din al-Qassam, po mbajnë peng dhe disa qytetarë amerikanë.
Zëdhënësi i Shtëpisë së Bardhë John Kirby tha: “Uashingtoni nuk ka ndërmend të vendosë forca ushtarake në terren pas sulmeve të ndërmarra nga Hamasi ndaj Izraelit, por do të mbrojë interesat amerikane në rajon”.
Koordinimi ushtarak
Sekretari amerikan i Mbrojtjes Lloyd Austin konfirmoi se aeroplanmbajtësja ishte dërguar për të patrulluar ujërat pranë.
“Ne kemi marrë gjithashtu hapa për të rritur skuadriljet luftarake F-35, F-16, F-15 dhe A-10 të Forcave Ajrore të SHBA-së në rajon”, shtoi Austin.
Që nga shpërthimi i operacionit të Hamasit, zyrtarë të lartë ushtarakë amerikanë kanë biseduar me homologët e tyre izraelitë dhe pala amerikane është zotuar të sigurojë të gjithë mbështetjen e mundshme për Izraelin.
Kryetari i Shtabit të Përbashkët të Forcave Amerikane, Gjenerali Charles Brown, foli dje në telefon me Shefin e Shtabit të Përgjithshëm të Izraelit, Herzi Halevi, për situatën e sigurisë në terren, hapat për forcimin e pranisë ushtarake amerikane në rajon dhe të forcojë përpjekjet rajonale parandaluese.
Në një intervistë me Al Jazeera-n, Wolfgang Pusztai, një ish-diplomat dhe ekspert për çështjet ndërkombëtare, theksoi se “qëllimi i pranisë së ‘Gerald R. Ford’ në brigjet izraelite është të pengojë çdo vend të huaj të ndërhyrë në luftën në Gaza”.
Ai hodhi poshtë mundësinë që “do të ketë një ndërhyrje tokësore të Shteteve të Bashkuara të Amerikës në Rripin e Gaza-s, por nuk ka dyshim se amerikanët do të ndërhyjnë në një farë mënyre nëse Irani sulmon Izraelin”.
Wolfgang beson se “raketat(amerikane) do t’i japin forcë shtesë sistemit të mbrojtjes antiraketë të Izraelit, i cili është në gjendje të rrëzojë raketat ndërsa ato janë ende mbi Iran”.
Ndërhyrje e mundshme
Raporte të shumta tregojnë për mundësinë që Shtetet e Bashkuara të hyjnë në luftë në Izrael nëse vende të tjera përfshihen në konflikt, i cili me sa duket i referohet Iranit.
Wall Street Journal raportoi dje se zyrtarët iranianë, së bashku me Hamasin kontribuan në përgatitjet për sulmin ndaj Izraelit, por të cilin Sekretari amerikan i Shtetit Anthony Blinken e mohoi dhe theksoi se zyrtarët amerikanë “duhet të shohin ende prova se Irani drejtoi ose qëndronte pas këtij sulmi të veçantë”.
Në një intervistë me rrjetin amerikan MSNBC, gjenerali në pension Barry McCaffrey tha: “Shtetet e Bashkuara ka të ngjarë të ndërhyjnë drejtpërdrejt me sulme ajrore dhe detare nëse mbijetesa e Izraelit kërcënohet”. Ai tha se një përshkallëzim i tillë ka të ngjarë të ndodhë vetëm nëse fqinjët e Lindjes së Mesme të Izraelit ndërhyjnë seriozisht.
McCaffrey theksoi: “Mbështetja jonë për Izraelin do të jetë absolute dhe nëse shohim ndërhyrje ushtarake siriane dhe ndërhyrje ushtarake aktive iraniane, ne do të shkojmë në luftë”.
McCaffrey përjashtoi dërgimin e forcave tokësore amerikane në Izrael, duke pasur parasysh aftësitë tokësore të ushtrisë izraelite.
Kur u pyet nëse aleatët e tjerë të Shteteve të Bashkuara dhe Izraelit do të ndërhynin gjithashtu, McCaffrey tha se ishte shumë herët për të diskutuar një çështje të tillë.
Dy skenarë
Shumë ekspertë ushtarakë, me të cilët Al Jazeera pati mundësinë të fliste, besojnë se prania ushtarake e SHBA pranë Izraelit është një mesazh i fortë për Iranin dhe Hezbollahun.
Këto luftanije mund të ndihmojnë gjithashtu në evakuimin e qytetarëve amerikanë nëse administrata e presidentit amerikan Joe Biden vendos ta bëjë këtë.
David Des Roches, një ish-zyrtar i Pentagonit dhe pedagog në Kolegjin Kombëtar të Luftës në Uashington, i tha Al Jazeera-s se Shtetet e Bashkuara mund të ndërhynin ushtarakisht në dy mënyra. E para është “për të kryer një operacion ushtarak për të shpëtuar qytetarët e kapur amerikanë” të mbajtur nga Al-Qassam, nëse përpjekjet diplomatike nuk çojnë në lirimin e tyre.
Një mënyrë tjetër është “një operacion masiv ushtarak në mbështetje të forcave izraelite, dhe kjo kërkon arsye të forta dhe marrëveshje brenda elitës qeverisëse amerikane, duke përfshirë liderët në Kongres”.
Në të dyja rastet, ndërhyrja ushtarake amerikane kërkon një vendim nga Biden, në cilësinë e tij si komandant i përgjithshëm i forcave të armatosura amerikane.
Giorgio Cafiero, një ekspert i çështjeve strategjike dhe drejtor i konsulencës Gulf State Analytics (GSA), i tha Al Jazeera-s se Uashingtoni mund të ndërhynte ushtarakisht nëse Irani “merr pjesë drejtpërdrejt” në operacionin e Hamasit, “i cili do të krijonte kushte në të cilat Administrata Biden do të vendoste që ndërhyrja ushtarake amerikane është e nevojshme”. /tesheshi.com/
