Kryengritesit sirianë kanë kapur të shtunën të paktën 16 anëtarë të forcave të armatosura të qeverisë, pas një sulmi në bazën e mbrojtjes ajrore Boukamal, në lindje të vendit.
Lajmin e bën të ditur Observatori Sirian për të Drejtat e Njeriut, sipas të cilit mes të burgosurve ka oficerë, nënoficerë dhe ushtarë të thjeshtë.
Pikërisht bazat ajrore pritet të kthehen në “mollën e sherrit” mes besnikëve të regjimit të Bashar al Assad dhe kryengritësve, burime nga të cilët bëjnë me dije se janë regjistruar 1600 viktima në 7 ditë.
“Dialogu politik është rruga e vetme dhe e drejtë për të zgjidhur krizën e gjatë siriane”. Kështu ka deklaruar ministri i Jashtëm kinez, Yang Jiechi, në një bisedë telefonike me të dërguarin e ri të OKB-së dhe Ligës Arabe, Lakhdar Brahimi.
“Kina është shumë e shqetësuar për përkeqësimin e situatës në Siri. Komuniteti Ndërkombëtar duhet të mbetet i fokusuar tek një zgjidhje politike për krizën”, ka thënë më tej Yang.
Kina, bashkë me Rusinë, ka bllokuar disa herë miratimin e një rezolute në Këshillin e Sigurimit të OKB-së, që do të mundësonte një ndërhyrje ushtarake ndërkombëtare në Siri, apo mbështetje ushtarake për rebelët e këtij vendi.
“Siria” në Asamblenë e Përgjithshme
Asambleja e Përgjithshme e OKB-së do të mbajë një mbledhje mbi Sirinë më 4 shtator. Lajmin e bënë të ditur disa ditë më parë burime diplomatike nga Pallati i Qelqtë.
Sekretari i përgjithshëm, Ban Ki Moon dhe përfaqësuesi i ri i posaçëm i OKB-së dhe Ligës Arabe, Lakhdar Brahimi do të raportojnë mbi zhvillimet e situatës në terren.
Për diplomatin algjerian, që ka zëvendësuar ish-sekretarin e përgjithshëm të Kombeve të Bashkuara Kofi Annan, bëhet fjalë për fjalimin e parë zyrtar që nga marrja e detyrës.kohaislame
