Në Prishtinë janë numëruar më shumë se 35,22 për qind të votave, ndërsa Lëvizja Vetëvendosje në këtë pikë prinë para Lidhjes Demokratike të Kosovës, me një diferencë prej 700 votash. VV-ja ka 35,31 për qind, ndërsa LDK-ja 33,46 për qind. Në Prishtinë, PDK-ja ka marrë 14,86 për qind.
Në Mitrovicë, kur janë numëruar më shumë se 60 për qind të votave, PDK-ja prin me 34,33 për qind, e pas saj me 100 vota më pak renditet Vetëvendosje, e që me përqindje del 33.74 për qind.
Në Pejë prinë LDK-ja me 31,14 për qind të votave, e ndjekur nga koalicioni AAK-PSD, me 28,15 për qind të votave. Lëvizja Vetëvendosje atje është e treta me 22,22 për qind, ndërsa PDK-ja ka mbetur me vota njëshifrore, 9,26 për qind. Në këtë qytet janë numëruar rreth 48 për qind të votave.
Në Gjakovë prin koalicioni AAK-PSD, me 36,93 për qind të votave, e ndjekur nga Lëvizja Vetëvendosje me 29,80 për qind të votave. LDK-ja atje është e treta me 17,93 për qind të votave, derisa PDK-ja edhe në këtë qytet është në shifrën nën 10 për qind. Në Gjakovë janë numëruar 38,73 për qind.
Në Prizren, janë numëruar 31,53 për qind të votave, e me to prin Lëvizja Vetëvendosje me 25 për qind të votave, e ndjekur nga Partia Demokratike e Kosovës me 22,95 për qind të votave. LDK-ja ka 19,10 për qind të votave.
Në Gjilan janë numëruar më shumë se gjysma e votave (53,49 për qind), dhe në këtë qytet me këtë numërim prin Lëvizja Vetëvendosje me 39,80 për qind. E ndjekur nga LDK-ja që ka rreth 3 mijë vota më pak, ose 27,54 për qind të votave.
Vetëvendosje është e para edhe në Ferizaj, ku janë numëruar 72,11 për qind, ndërsa ka marrë 34,07 për qind të votave, ndërsa PDK-ja është e dyta me 25,32 për qind të votave. LDK-ja është e treta me 24,59 për qind të votave.
