Nëna i tha të birit se nëse e kryen ushqimin do të të dërgoj në park. I biri arriti ta kryente ushqimin dhe i tha: “Nëna ime, eja të shkojmë tani në park!”
Ajo ia kthehu: “Koha kaloi dhe jashtë është një egërsirë që i ha fëmijët, tani nuk mund të dalim.”
Djaloshi u ul i mërzitur dhe ndërkohë i dëgjonte zërat e fëmijëve duke lozur jashtë në rrugë pa i kafshuar asnjë egërsirë.
Rrëfimi vazhdon…
Djaloshi u rrit pak dhe hyri në shkollë. Mësuesi i lajmëroi se ata që e përmirësojnë sjelljen, do t’i marrë në shëtitje në fundjavë. Djaloshi u mundua që të bëhet prej të parëve që do t’i zgjedhë mësuesi për shëtitje dhe pasi përfundoi java e pyeti mësuesin: “Kur do të shkojmë në shëtitje?”
Mësuesi u përgjigj: “Për cilën shëtitje flet?!”
Rrëfimi vazhdon….
Babai i djaloshit hyri në shtëpi dhe e gjeti të birin duke i përsëritur mësimet dhe i tha: “Biri im, nëse kalon me sukses këtë vit do të ta blej një biçikletë.”
Përfundoi viti dhe djali doli i pari në klasën e tij. Shkoi te babai dhe i tha:
“Ku është biçikleta ime?!” Prindi ia kthehu: “Biçikleta është e rrezikshme, ka mundësi të të ndodhë ndonjë fatkeqësi, lëre atë!”
Rrëfimi vazhdon…
Fëmija u rrit dhe u bë një gënjeshtar dhe mashtrues i madh dhe të gjithë e pyesnin:
“Prej nga erdhe me këtë moral dhe sjellje të keqe?!”
Shkroi: Irfan Jahiu
