Shefi i Agjencisë Qendrore të Inteligjencës Amerikane, William Burns, do të jetë në Izrael të martën për bisedime mbi armikun e përbashkët Iranin, pasi rritja e tensioneve i “errësoi” bisedimet për rivendosjen e një marrëveshjeje historike bërthamore.
Sidoqoftë, shkruajnë mediat e huaja, përcjell Telegrafi, një zëdhënës i kryeministrit Naftali Bennett nuk dha detaje mbi agjendën e bisedimeve të shefit të CIA-s në Izrael.
Por faqja e internetit e Walla News tha se ai do të diskutonte programin bërthamor të Iranit dhe aktivitetet e tij në rajon me Bennett dhe homologun e tij izraelit David Barnea.
Walla News tha se Burns gjithashtu do të udhëtonte në Ramallah në Bregun Perëndimor të pushtuar nga Izraeli, për bisedime me presidentin palestinez Mahmud Abbas dhe shefin e inteligjencës Majed Faraj.
Vizita vjen mes asaj që analistët e kanë quajtur një “luftë në hije”, e cila ka parë një valë sulmesh ndaj anijeve të lidhura me Iranin dhe Izraelin.
Ndryshe, një diplomat karriere, Burns luajti një rol kyç në afrimin e SHBA me Iranin që çoi në një marrëveshje bërthamore të vitit 2015 midis Iranit dhe fuqive të mëdha.
Por me mbështetje të fortë nga Izraeli, presidenti i atëhershëm Donald Trump braktisi marrëveshjen në vitin 2018 dhe rivendosi sanksionet ndaj Iranit. /Telegrafi/
