Këtë vit, Parlamenti Evropian ka rregulluar planin e tij të financimit duke shpërndarë 31 milionë euro për grupet politike pas zgjedhjeve të qershorit.
Bëhet e ditur se shumica e këtyre fondeve shpërndahen në mënyrë proporcionale me numrin e eurodeputetëve në grup.
Sipas një dokumenti të siguruar nga Euronews, buxheti i ndarë për grupet politike për gjysmën e dytë të vitit 2024 (korrik-dhjetor) është 31 milionë euro.
Partia Popullore Evropiane (EPP) mori më shumë se 8 milionë euro, Aleanca Progresive e Socialistëve dhe Demokratëve (S&D) rreth 6 milionë euro dhe Patriotët për Evropën 3,7 milionë euro, përcjell Telegrafi.
“Financimi i përgjithshëm që Parlamenti Evropian ndan për grupet politike është rreth 65 milionë euro në vit, që do të thotë se çdo eurodeputet vlen mesatarisht rreth 90,000 euro”, tha Wouter Wolfs, pedagog i politikës evropiane në Universitetin e Leuven.
Cila është llogaritja pas pagesës?
Siç raportohet, fondet në buxhetin e Parlamentit Evropian u paguhen grupeve politike në bazë të llogaritjes së mëposhtme: 97.5% ndahen në raport me numrin e deputetëve dhe 2.5% shpërndahen në mënyrë të barabartë.
“Pjesa më e madhe shpërndahet në përpjesëtim me numrin e eurodeputetëve në grupet politike. Prandaj, grupet më të mëdha marrin më shumë fonde, ndërsa grupet më të vogla marrin më pak fonde”, shpjegoi Wolfs.
Grupet politike i përdorin këto fonde për të financuar fushatat e informimit publik mbi aktivitetet e tyre në Parlamentin Evropian, si votat e tyre apo nismat legjislative.
“Këto ndarje janë të destinuara për të mbuluar shpenzimet administrative dhe operacionale”, tha shërbimi për shtyp i Parlamentit Evropian.
Cilët janë kufijtë e buxhetit?
Në të kundërt, ky buxhet nuk mund të përdoret për të mbështetur partitë politike kombëtare apo për të financuar fushatat zgjedhore.
Në të kaluarën, Parlamenti ka nisur procedurat për rikuperimin e këtyre fondeve kur mendonte se ato ishin keqpërdorur.
“Në Danimarkë, Partia Popullore Daneze e përdori financimin e grupit për të mbështetur fushatat e saj në Facebook në prag të zgjedhjeve kombëtare daneze”, tha Wolfs.
“Në Francë, Fronti Kombëtar u akuzua gjithashtu për keqpërdorim të fondeve grupore për partitë dhe kandidatët kombëtarë”, shtoi ai.
Ndryshe, përveç 31 milionë eurove të akorduara për grupet politike, Parlamenti Evropian siguron fonde të tjera, këtë herë për eurodeputetët, për të punësuar asistentët e tyre.
Ky organ përdor edhe fonde të tjera për financimin e partive politike evropiane, për të mos u ngatërruar me grupet politike dhe paguan këshilltarë politikë për të mbështetur punën e grupeve. /Telegrafi/
