Dyshja e kontinentit, takim e bisedë mbi sfidat nga Lindja
Lufta agresive e Rusisë është kërcënimi më i madh për paqen dhe sigurinë në Evropë, dhe ndihma e forcave të Koresë së Veriut për Rusinë përfaqëson një përshkallëzim të madh të luftës kundër Ukrainës, përfunduan të martën presidentja e Komisionit Evropian Ursula von der Leyen dhe Sekretari i Përgjithshëm i NATO-s Mark Rutte.
“Lufta agresive e Rusisë në tokën evropiane është kërcënimi më i madh i vetëm për paqen dhe sigurinë në kontinentin evropian”, thuhet në një deklaratë të përbashkët pas takimit të parë mes Von der Leyen dhe Rutte, i cili së fundmi mori postin e Sekretarit të Përgjithshëm të NATO-s.
Të dy bien dakord se “vendosja e ushtarëve të Koresë së Veriut në mbështetje të luftës agresive të Rusisë përfaqëson një përshkallëzim të rëndësishëm të luftës kundër Ukrainës, si dhe një kërcënim serioz për sigurinë evropiane dhe paqen globale”.
Në takimin e tyre të parë, u ra dakord për krijimin e një grupi pune të nivelit të lartë për të forcuar bashkëpunimin ekzistues midis BE-së dhe NATO-s.
Rutte dhe Von der Leyen diskutuan gjithashtu mbi vendosmërinë në rritje të shteteve autoritare në skenën botërore.
“Këto vende po vënë në dyshim interesat, vlerat dhe parimet tona të përbashkëta demokratike, duke përdorur mjete të shumta – politike, ekonomike, teknologjike dhe ushtarake”, theksuan Rute dhe Von der Leyen. /tesheshi.com/
