– Projektligji për pagat e funksionarëve publikë, siç duket ka zgjuar reagimin e shtresës punëtore.
Ky projektligj, që është miratuar nga ekzekutivi dhe pritet të miratohet edhe nga Kuvendi i Kosovës, parasheh rritje pagash për zyrtarët politikë.
I pari që do të përfitojë nga kjo rritje është vetë kryeministri i Kosovës, pastaj zëvendëskryeministrat, ministrat dhe shumë zyrtarë të tjerë, raporton Radio Evropa e Lirë.
Ali Dragusha, përfaqësues i sindikatave të punëtorëve, këtë projektligj e konsideron të ngutshëm dhe jo në harmoni më realitetin në Kosovë.
Sipas tij, rritja e pagave për klasën politike është plotësisht në kundërshtim më pagat e shtresës punëtore.
Dragusha i rekomandon qeverisë që të rishqyrtojë dhe të korrigjojë këtë dokument, në të kundërtën, thotë ai, ekzekutivi po detyron shtresën punëtore për shprehje të revoltës dhe pakënaqësisë se tyre.
“Në qoftë se qeveria mendon se ka mjete për një rritje të tillë, atëherë rritja duhet të realizohet në të gjitha nivelet dhe duhet të bëhet edhe për klasën punëtore”.
“Ne të kundërtën, ne si organizatë sindikale, jemi të shtrënguar të reagojmë dhe të gjejmë forma të reagimit për shprehjen e një revolte dhe një pakënaqësie në këtë kohë, kur dihet gjendja ekonomike dhe politike”, thotë Dragusha.
Ndryshe, sipas dokumenteve zyrtare, paga vjetore aktuale e kryeministrit është 17 mijë e 318 euro, që në muaj i bie 1 mijë e 443 euro.
Por, me projektligjin e ri, pagës së kryeministrit do t’i shtohen edhe 882 euro, që do të thotë se paga mujore e kryeministrit do të jetë 2 mijë e 325, aq sa do të jetë edhe e kryetarit të Kuvendit, Jakup Krasniqit dhe kryetarit të Gjykatës Kushtetuese, Enver Hasanit.
Në anën tjetër, pagat e zyrtarëve të lartë sillen prej rreth 1 mijë e 200 euro, deri rreth 2 mijë e 800 euro, sa është paga e presidentes së Kosovës, Atifete Jahjaga.
Por, kjo shumë e pagave është në dallim të madh me pagën mesatare në Kosovë, thotë Dragusha
Në kohën kur pensionistët marrin nga 40, përkatësisht 80 euro në muaj, paga minimale është 170 euro, kurse ajo mesatare 368 euro dhe rreth 35 mijë familje jetojnë vetëm me ndihma sociale, hapin e qeverisë, Dragusha e quan të ngutshëm, regresiv dhe të paarsyeshëm.
“Mendoj se propozim i tillë është shumë i paarsyeshëm dhe shumë i pamatur, mu në këtë kohë kur kemi shumë çështje të pazgjidhura, e veçanërisht ne si sindikatë e kemi problemin e marrëveshjes se përgjithshme kolektive, për të cilën qeveria nuk vërehet se është e gatshme të nënshkruajë, duke u bazuar mu në çështjen financiare dhe vërejtjet që merr nga Fondi Monetar Ndërkombëtar”, shprehet Dragusha.
Edhe eksperti i ekonomisë, Ismail Kastrati, thotë se ekzekutivi po diskriminon qytetarët kosovarë, pasi thotë ai, ekzekutivi dhe legjislativi zakonisht punojnë për rritjen e pagave të tyre dhe jo për mirëqenin e qytetarëve të Kosovës.
“Unë mendoj se është një rritje e pamatur dhe kryeministri nuk ka fare parasysh një balanc në mes kategorive të ndryshme edhe të zyrtarëve të rangjeve të ndryshme, por edhe aspektit social”.
“Kryeministri vepron në bazë të interesave të momentit, nuk ka ndonjë vizion, qeveria edhe ashtu nuk ka ndonjë plan politik të zhvillimit”, deklaron Kastrati.
Në anën tjetër, përfaqësues të shoqërisë civile, e vlerësojnë në dy aspekte projektligjin për pagat e funksionarëve të lartë.
Isuf Zejna, nga Instituti Demokratik i Kosovës, thotë se në njërën anë ligji është i nevojshëm, mirëpo në anën tjetër është në kundërshtim më standardin jetësor në Kosovë.
“Është i nevojshëm, për shkak se duhet të harmonizohen pagat e zyrtarëve të lartë publikë, kemi një shpërputhje të madhe në mes përfaqësuesve të bordit, deputeteve, anëtarëve të qeverisë, dhe ligji tenton t’i harmonizojë këto paga”.
“Mirëpo, në anën tjetër, një numër i zyrtarëve publikë, siç duket ata të ekzekutivit, të cilët edhe kanë hartuar ligjin, kanë paraparë rritje të pagave. Mendoj se kjo është në kundërshtim me vet standardin të cilin ne e kemi në Kosovë dhe me pagën mesatare në Kosovë”, thekson Zejna.
Sidoqoftë, për projektligjin në fjalë, përmes një komunikate për media, ka reaguar Këshilli Gjyqësor i Kosovës.
Ky këshill ka reaguar ndaj kategorizimit të ri të pagave që rezulton, siç thuhet, në kompensim më të ulët të përfaqësuesve të pushtetit gjyqësor në krahasim me përfaqësuesit e pushtetit ekzekutiv dhe pushtetit legjislativ.kohaislame
