Presidenti rus Vlladimir Putin deklaroi se forcat e armatosura janë pajisur me rreth 140.000 dronë vitin e kaluar dhe sipas vlerësimit të tij, prodhimi i këtij viti do të jetë dhjetëfish më i madh.
Duke iu drejtuar një takimi të Komisionit Ushtarak-Industrial në Moskë për të diskutuar zhvillimin e dronëve për qëllime të veçanta, Putin tha se, përveç sasive, industria ruse e mbrojtjes planifikon të prodhojë më shumë lloje të dronëve.
“Këtë vit, prodhimi i dronëve është planifikuar të rritet ndjeshëm, me saktësi pothuajse dhjetëfish… shumica e tyre do të dërgohen në ushtritë në vijën e frontit”, tha ai.
Putin theksoi se, përveç prodhimit të dronëve, është i nevojshëm zhvillimi i sistemeve që do t’i lejojnë ata të çaktivizohen, qoftë duke qëlluar ose duke i bllokuar me armë ushtarake.
Presidenti rus e quajti prodhimin e një shumëllojshmërie të gjerë të dronëve një “detyrë kyç”, duke kërkuar që prodhimi masiv të fillojë “sa më shpejt të jetë e mundur”.
“Dhe theksoj se po flasim për prodhim serik të pajisjeve kaq premtuese. Dhe, sigurisht, ne duhet të krijojmë një themel për të ardhmen. Kjo do të thotë se tashmë mund të parashikojmë se çfarë detyrash do të zgjidhin dronët nesër”, theksoi Putin.
/trt/
