Gjoba e rëndë që po ndan më shumë BE-në nga anëtari i saj rebel
Budapestit së shpejti do t’i hiqet një “pjesë e byrekut” të fondeve të BE-së për shkak të refuzimit të saj për të paguar gjobën e vendosur nga Gjykata Evropiane e Drejtësisë.
Komisioni Evropian ka nisur një procedurë të veçantë për konfiskimin e gjobës prej 200 milionë euro të vendosura nga Gjykata Evropiane e Drejtësisë (GJED) ndaj Hungarisë për shkak të kufizimeve afatgjata të së drejtës për azil në atë vend. Gjoba duhej t’i paguhej si një shumë e madhe Komisionit Evropian.
Budapesti humbi afatin e parë në fund të gushtit, prandaj Komisioni dërgoi një kërkesë të dytë pagese me afat deri më 17 shtator. Meqenëse edhe kjo kërkesë e dytë u shpërfill, Komisioni njoftoi të mërkurën se do të aktivizojë të ashtuquajturën “procedurë e kompensimit” për të hequr gjobën prej 200 milionë euro nga pjesa e Hungarisë në fondet e BE-së.
Përafërsisht 21 miliardë eurofonde për kohezionin dhe rimëkëmbjen e destinuara për Hungarinë janë ende të ngrira për shkak të pretendimeve të Brukselit për rënie të sundimit të ligjit në atë vend.
“Nga sot po kalojmë në fazën e kompensimit. Duhet të identifikojmë se çfarë vjen më pas dhe të shohim pagesat që mund të thithin gjobën në fjalë,” tha një zëdhënës i Komisionit të mërkurën, sipas Euroneës. Në të njëjtën kohë, Hungaria përballet me një gjobë prej një milion eurosh për çdo ditë që vazhdon të veprojë në kundërshtim me vendimin e GJED-së. Gjoba e akumuluar është afër 100 milionë euro.
Budapesti duhet t’i përgjigjet Komisionit duke shpjeguar se cilat masa, nëse ka, ka vendosur për të respektuar vendimin. Duke qenë se përgjigja nuk erdhi, Komisioni dërgoi kërkesën e parë për vjeljen e gjobës, me afat 45 ditë. Vendimi i GJED-së, në të cilin gjyqtari e përshkroi veprimin e Hungarisë si një “shkelje të paprecedentë dhe jashtëzakonisht të rëndë të ligjit të BE”, shkaktoi një reagim të zemëruar nga kryeministri Viktor Orbán, i cili e quajti gjobën shumëmilionëshe “të egër dhe të papranueshme”.
Në shenjë hakmarrjeje, qeveria e tij kërcënoi se do t’i transportonte migrantët me autobus për në Belgjikë “vullnetarisht” dhe “falas”, në atë që do të ishte një rast i paprecedentë i migrimit të instrumentalizuar nga një shtet anëtar kundër një tjetri. Emigrantët nuk janë transportuar ende, por skema tashmë ka hasur në kritika të ashpra nga autoritetet belge dhe ato të BE-së. /tesheshi.com/
