Për lotderdhësit hipokritë ndaj një shteti që ushtron terror me dekada ndaj një populli
Pas një sulmi të befasishëm të Hamasit ndaj Izraelit, media e shtete perëndimore po qëmtojnë të gjejnë fakte terrori të grupi militant palestinez, duke mbajtur në mënyrë hipokrite, deri dhe antinjerëzore, një qëndrim kah Izraeli, një shtet tipik terrori e aparteidi, me mbi 30 rezulota të shkelura të OKB-së dhe me disa masakra genocidale në vite mbi popullsinë civile.
E tani, ndërsa avionët luftarakë izraelitë bombardojnë Rripin e Gazës në hakmarrje për sulmin nga Hamas, grupi palestinez tha se planifikon të përdorë izraelitë të marrë peng për të ndërmjetësuar një marrëveshje për lirimin e palestinezëve në burgjet izraelite.
Dhe cili është ky realitet që lotderdhësit për Izraelin bëjnë sikur nuk e njohin apo s’e shohin?
Sa palestinezë janë aktualisht në paraburgim izraelit dhe sa fëmijë janë mes tyre?
Palestinezët në burgjet në Izrael
Shumë do të thoshin se e gjithë Gaza është në fakt një burg në ajër të hapur – 2.2 milionë njerëz të bllokuar nga Izraeli në një enklavë të vogël bregdetare.
Por numri i palestinezëve që kanë kaluar kohë në burgjet aktuale izraelite është i përmasave të ngjashme. Që nga viti 1967, kur Izraeli pushtoi Jerusalemin Lindor, Rripin e Gazës dhe Bregun Perëndimor, ky shtet, që nga një pjesë e botës cilësohet “terrorist”, ka arrestuar rreth një milion palestinezë, sipas një raporti nga Kombet e Bashkuara verën e kaluar.
Një në pesë palestinezë është arrestuar dhe akuzuar me 1600 dekrete ushtarake që kontrollojnë çdo aspekt të jetës për palestinezët që jetojnë nën pushtimin ushtarak izraelit. Kjo shkallë e burgosjes dyfishohet për burrat – dy në çdo pesë arrestohen.
Për krahasim, në SHBA, një vend i njohur për numrin më të madh të të burgosurve në botë, një në 200 persona është i burgosur. Shkalla e burgosjes në mesin e amerikanëve me lëkurë të errët është më shumë se trefishi i shkallës së përgjithshme, por edhe kjo është e pakrahasueshme me gjasat që palestinezi mesatar të përballet me burgim.
Grupi për të drejtat e të burgosurve palestinezë Addameer e përshkroi sistemin e burgjeve izraelite si “një kompleks makinerie monstruoze në forma, ligje, procedura dhe politika… të krijuara për të likuiduar dhe vrarë”.
Sot, numri i palestinezëve pas hekurave izraelite është 5200, duke përfshirë 33 gra dhe 170 fëmijë. Nëse gjykohen, të burgosurit palestinezë gjykohen para gjykatave ushtarake.
Pse ka kaq shumë të burgosur?
Dy muaj pasi Izraeli pushtoi territoret palestineze dhe arabe në luftën e vitit 1967, qeveria e tij nxori Urdhrin Ushtarak 101, i cili në thelb kriminalizonte aktivitetet civile bazuar në “propagandën armiqësore dhe ndalimin e nxitjes”.
Urdhri, i cili është ende në fuqi në Bregun Perëndimor të okupuar, ndalon pjesëmarrjen dhe organizimin e protestave, shtypjen dhe shpërndarjen e materialeve politike, valëvitjen e flamujve dhe simboleve të tjera politike dhe çdo aktivitet që tregon simpati për një organizatë që konsiderohet e paligjshme nga urdhrat ushtarakë.
Tre vjet më vonë, qeveria izraelite lëshoi një urdhër tjetër ushtarak (378). Kjo krijoi gjykata ushtarake dhe në mënyrë efektive ndaloi të gjitha format e rezistencës palestineze ndaj pushtimit izraelit, të cilat quhen “terrorizëm”.
Që atëherë, qindra urdhra të tjerë ushtarakë janë lëshuar dhe zbatuar për të kufizuar çdo shprehje civile dhe politike palestineze.
Në sa burgje izraelite ka të burgosur palestinezë?
Ka 19 burgje brenda Izraelit dhe një brenda Bregut Perëndimor të pushtuar që mbajnë të burgosur palestinezë.
Sipas Konventës së Katërt të Gjenevës, është kundër ligjit ndërkombëtar që një fuqi pushtuese të zhvendosë një popull të pushtuar nga një territor i pushtuar.
“Është e paligjshme dhe mizore, dhe pasojat për personat e burgosur dhe të dashurit e tyre, të cilëve shpesh u mohohet qasja tek ata për muaj dhe nganjëherë vite, mund të jenë shkatërruese,” tha më parë Amnesty International.
Çfarë është ndalimi administrativ?
Më shumë se 1,260 palestinezë janë në paraburgim administrativ, që do të thotë se mbahen pas hekurave për një kohë të pacaktuar pa gjyq ose asnjë akuzë. Praktika, një mbetje nga epoka e Mandatit Britanik, mund të zgjatet për një kohë të pacaktuar bazuar në “prova sekrete”, që do të thotë se një i burgosur mund të kalojë muaj, nëse jo vite, në burg pa u akuzuar.
Ndërsa Izraeli thotë se procedura i lejon autoritetet të arrestojnë të dyshuarit ndërsa ata vazhdojnë të mbledhin prova, kritikët dhe grupet e të drejtave thonë se sistemi është abuzuar gjerësisht.
Sa fëmijë palestinezë ka arrestuar Izraeli?
Që nga shpërthimi i Intifadës së dytë në vitin 2000, më shumë se 12,000 fëmijë palestinezë janë arrestuar nga forcat izraelite.
Të paktën 700 fëmijë palestinezë nën moshën 18 vjeç nga Bregu Perëndimor i pushtuar ndiqen penalisht në gjykatat ushtarake izraelite çdo vit pasi arrestohen, merren në pyetje dhe ndalohen nga ushtria izraelite.
Addameer e përshkruan arrestimin dhe burgosjen e fëmijëve si sistematik dhe pjesë e një fushate ndëshkimi kolektiv.
Akuza më e zakonshme është hedhja e gurëve, e cila dënohet maksimalisht me 20 vjet.
Fëmijët shpesh janë të ekspozuar ndaj torturave fizike dhe psikologjike, sipas shoqatave për të drejtat e fëmijëve. Ata merren në pyetje pa praninë e prindërve apo avokatëve të tyre dhe kritikët kanë akuzuar Izraelin se e ka përdorur ndalimin e tyre për t’i kthyer në informatorë dhe për t’i detyruar familjet e tyre të paguajnë gjoba të mëdha.
Cilat janë disa nga dekretet ushtarake izraelite kundër fëmijëve palestinezë?
Urdhri Ushtarak 1726 thotë se fëmijët mund të mbahen në paraburgim për 15 ditë përpara se të ngrihet aktakuza dhe se gjykata ushtarake mund ta zgjasë atë paraburgim me 10 ditë çdo herë, deri në 40 herë.
Urdhri Ushtarak 1745 përcakton se marrja në pyetje e fëmijëve duhet të regjistrohet audio-vizualisht në një gjuhë që fëmijët e kuptojnë, por përjashton fëmijët e arrestuar nën pretekste sigurie, gjë që zbatohet për të gjithë fëmijët palestinezë të ndaluar.
Sipas Dekretit Ushtarak 132, fëmijët palestinezë të moshës 16 vjeç e lart u gjykuan më parë nga gjykatat ushtarake izraelite dhe u dënuan sikur të ishin të rritur.
Gjithashtu, fëmijët palestinezë vazhdojnë të akuzohen sipas moshës së tyre në kohën e dënimit, dhe jo sipas moshës së tyre në kohën e krimit të supozuar, siç kërkohet nga ligji ndërkombëtar.
Në gusht 2016, Izraeli ndryshoi ligjin e tij që fëmijët nën moshën 14 vjeç nuk mund të mbahen penalisht përgjegjës. Kjo u bë pasi autoritetet izraelite pritën derisa Ahmed Manasra, i cili ishte 13 vjeç në kohën e arrestimit të tij, të mbushte 14 vjeç përpara se ta akuzonin për tentativë vrasje dhe ta dënonin me 12 vjet burg – që më vonë u reduktua në nëntë vjet. /tesheshi.com/
