“Ky është gjenocid. Ata po e bëjnë këtë për të nxjerrë popullin palestinez nga Gaza dhe për të marrë nën kontroll atë vend. Kreu i shtetit që kreu këtë gjenocid është fajtor kundër njerëzimit”, tha Petro
Presidenti i Kolumbisë, Gustavo Petro ka reaguar ndaj përdorimit të “bombës me fosfor të bardhë” nga Izraeli në Gaza, transmeton Anadolu.
Në llogarinë e tij në X, Petro postoi imazhe të momentit kur Izraeli përdori “bombë me fosfor të bardhë” në Gaza. “Bomba që shihni në video është prej fosfori të bardhë. Kimikati ngjitet në lëkurë dhe depërton në kocka dhe vret me dhimbje të forta. Shteti i Izraelit e hodhi këtë”, shkroi Petro.
Ai tha se kjo përbën krim lufte për sa i përket të drejtës ndërkombëtare. “Ka fëmijë që luajnë poshtë. Vendi ku u hodh bomba i përket Kombeve të Bashkuara (OKB). E drejta ndërkombëtare i detyron të gjitha kombet në botë ta respektojnë atë. Krimineli i luftës duhet të gjykohet dhe të burgoset pa marrë parasysh fenë, ideologjinë dhe kombin e tij”, tha Petro.
Presidenti kolumbian bëri një “reagim të fortë” ndaj sulmeve me bomba të Izraelit në spitale dhe shkolla më 31 tetor, duke thënë: “Ky është gjenocid. Ata po e bëjnë këtë për të nxjerrë popullin palestinez nga Gaza dhe për të marrë nën kontroll atë vend. Kreu i shtetit që kreu këtë gjenocid është fajtor kundër njerëzimit. Aleatët e tij nuk mund të flasin për demokraci”.
Petro dhe presidenti kilian, Gabriel Boriç tërhoqën për konsultime ambasadorët e tyre në Tel Aviv për shkak të sulmeve të vazhdueshme të Izraelit në Gaza. Presidenti kolumbian njoftoi se do të hapte ambasadë në Ramallah pas takimit me ambasadat izraelite dhe palestineze në Bogota më 20 tetor.
Bolivia gjithashtu ndërpreu marrëdhëniet diplomatike me Izraelin
Zëdhënësja presidenciale e Bolivisë, Maria Nela Prada dhe zëvendësministri i Jashtëm, Freddy Mamani në një konferencë të përbashkët njoftuan se ata vendosën të ndërpresin marrëdhëniet diplomatike me Izraelin.
/aa/
