“Ne nuk do të heqim dorë nga kauza palestineze dhe veçanërisht nga Rripi i Gazës. Nëse na hapin kufirin mes Egjiptit dhe Gazës, ne kemi çfarë të bëjmë”, tha Presidenti i Algjerisë, Abdelmadjid Tebboune
Presidenti i Algjerisë, Abdelmadjid Tebboune, njoftoi se vendi i tij nuk do të heqë dorë kurrë nga kauza palestineze dhe se Algjeria është e gatshme që të ndërtojë 3 spitale fushore për 20 ditë në Rripin e Gazës në rast se hapet pika kufitare Rafah, transmeton Anadolu.
Presidenti Tebboune, i cili është sërish kandidat në zgjedhjet presidenciale që do të mbahen në Algjeri më 7 shtator, u takua me mbështetësit e tij në programin e zhvilluar në qytetin Constantine në verilindje të vendit.
“Ne nuk do të heqim dorë nga kauza palestineze dhe veçanërisht nga Rripi i Gazës. Nëse na hapin kufirin mes Egjiptit dhe Gazës, ne kemi çfarë të bëjmë. Ushtria jonë është gati. Sapo të hapet kufiri (Pika Rafah), do të ndërtojmë 3 spitale brenda 20 ditëve”, tha Tebboune.
Duke tërhequr vëmendjen për gjenocidin dhe shkatërrimin e kryer nga Izraeli në Rripin e Gazës, Tebboune u shpreh: “Ne do të dërgojmë qindra mjekë. Ne do të rindërtojmë atë që u shkatërrua nga Sionistët (Izraeli)”.
Duke vënë theksin se kauza palestineze nuk i përket vetëm palestinezëve, por edhe algjerianëve, Tebboune theksoi: “Palestina dhe Algjeria janë larg njëra-tjetrës për sa i përket distancës, por të afërta në zemër. Edhe pse ishim nën sundimin kolonial gjatë periudhës së Nakbes (1948), ne luftuam kundër sionistëve dhe pësuam dëshmorë”.
Pasi tërhoqi vëmendjen se lufta e Izraelit në Rripin e Gazës nuk është një luftë e civilizuar dhe se ai ka kryer një masakër të tmerrshme, Tebboune deklaroi se “Ata synojnë të shkatërrojnë kauzën palestineze duke shkatërruar palestinezët. Por ne kurrë nuk do ta pranojmë këtë”.
Gjykata Kushtetuese e Algjerisë njoftoi më 1 gusht se kandidaturat e kandidatit të pavarur Abdelmadjid Tebboune, Youcef Aouchiche nga Lëvizja e Forcave Socialiste (FFS) dhe Abdelaali Hassani Cherif nga Lëvizja për Shoqërinë e Paqes (MSP) u finalizuan për zgjedhjet që do të mbahen më 7 shtator.
/AA/
