Michael Phelps ka rrëfyer se kishte menduar të bënte vetëvrasje, pasi e kishte fituar medaljen e artë në kulmin e karrierës së tij në Lojërat Olimpike të vitit 2012.
32-vjeçari ka treguar për luftën e tij të gjatë me depresionin, me të cilin ishte përballur pas çdo turneu të madh që nga viti 2004.
Kampioni i notit ishte detyruar të kërkonte ndihmë profesionale në vitin 2012, kur ishte arrestuar për vozitje në gjendje të dehur dhe ishte marrë vesh se ai abuzonte me droga.
Këto ngjarje kishin ndikuar shumë në imazhin e tij, aq sa atleti më i dekoruar kishte menduar të bënte vetëvrasje.
Phelps, i cili është baba i një fëmije dhe gruaja e tij, Nicole Johnson, është në pritje të fëmijës së dytë, ka treguar përvojën e tij të vështirë duke u sugjeruar atyre që vuajnë nga problemet mendore që të kërkojnë ndihmën e nevojshme.
Sportisti ka treguar se episodin e parë të depresionit e kishte përjetuar si 15-vjeçar, menjëherë pasi e kishte fituar medaljen e parë të artë në Lojërat Olimpike në Athinë.
“Pas përfundimit të Lojërave Olimpike, bija në një gjendje të rëndë depresioni”, ishin fjalët e tij në Forumin Kennedy në Chicago.
Në vitin 2008, ai fitoi tetë medalje të arta duke thyer rekordin botëror, mirëpo imazhi i tij në SHBA u dëmtua, pasi u publikuan fotografi ku shfaqej duke marrë drogë.
Po ashtu, në atë periudhë, ishte arrestuar në dy raste për vozitje në gjendje të dehur.
Phelps ka rrëfyer se momenti më i rëndë për të kishte ardhur pas Lojërave Olimpike të vitit 2012, kur i kishte kaluar pesë ditë i mbyllur në dhomë, pa ushqim dhe pa gjumë.
“Nuk doja të isha më pjesë e sportit. Nuk doja të jetoja”, ka treguar sportisti duke shtuar se në momente më të errëta: “Mendoni për vetëvrasjen”.
Menjëherë pas, kampioni i notit kishte kërkuar ndihmë mjekësore dhe pastaj ka vendosur të flasë për ndjenjat dhe gjendjen e tij.
Kur kishte nisur të hapej për këtë çështje, gjerat ishin bërë më të lehta.
“Ia kam thënë vetes disa herë: ‘Pse nuk e kam bërë këtë para 10 vitesh? Por, nuk isha i gatshëm”, ka theksuar ai.
“Jam shumë falënderues që nuk bëra vetëvrasje”, ka theksuar 32-vjeçari duke falënderuar terapinë për tejkalimin e problemeve me depresionin.
Phelps tashmë ka edhe fondacionin e tij që promovon jetën e shëndetshme dhe aktive të fëmijëve përmes notit, që njëherësh ofron edhe programe për menaxhimin e stresit.
Amerikani i famshëm thotë se ndihma që u bën të tjerëve e plotëson më shumë se çdo arritje në karrierën e tij si sportist.
Sipas të dhënave statistikore, 25 milionë amerikanë vuajnë nga depresioni, ndërsa vetëvrasja aktualisht është shkaktari i 10-të i vdekshmërisë në atë vend.
