Më 14 mars 2016, BE-ja nënshkroi një marrëveshje për viza (me qëndrim afatshkurtër) me Perunë, në një ceremoni që është zhvilluar në Bruksel.
Në emër të BE-së, marrëveshja u nënshkrua nga Bert Koenders, ministër i Punëve të Jashtme dhe Evropiane të Holandës dhe kryetar i Këshillit, si dhe nga Dimitris Avramopulos, Komisioneri për Migrim, Çështje të Brendshme dhe Shtetësi.
Në anën peruane, marrëveshja u nënshkrua nga Ana María Sánchez de Rios, ministre e Punëve të Jashtme, transmeton Telegrafi.
Nënshkrimi u bë në prani të presidentit peruan, Ollanta Humala, dhe Përfaqësueses së Lartë të BE-së për Punë të Jashtme dhe Politika të Sigurisë, Federica Mogherini.
Regjimi i ri i vizave parashikon udhëtimin pa viza për qytetarët e BE-së kur udhëtojnë në territorin e Perusë dhe për qytetarët e Perusë, kur udhëtojnë në BE, për një periudhë qëndrimi prej 90 ditësh në çdo periudhë 180-ditore. /Telegrafi/
