Konsullata e Kosovës në Shtutgart është në dijeni për problemin, me të cilin ballafaqohet diaspora kosovare që jeton në këtë land, që fëmijëve të tyre u figuron se janë shtetas të Serbisë deri në moshën 16-vjeçare, kur ata do të mund të zgjedhin për ta mbajtur njërën nga tri shtetësitë që u figuron në certifikatat e tyre.
Në një komunikim me KIKS Kosovën, zyrtari i kësaj konsullate ka thënë se ky është një problem, me të cilin ballafaqohen ata dhe familjet kosovare që nga momenti kur është hapur kjo konsullatë.
Këtë problem, ata thonë që e kanë lajmëruar te secila qeveri që ka udhëhequr me Kosovën në këto 15 vjetët e fundit, por asnjëherë nuk kanë marrë një përgjigje konkrete për metodën se si duhet ta zgjidhin atë.
Ky problem në të kaluarën ka qenë më i theksuar, kur me dhjetëra kosovarë u ishin drejtuar konsullatave, të frustruar që pavarësisht faktit që të dy prindërit ishin shqiptarë nga Kosova, në shtetësinë e fëmijëve të tyre po u figuronte edhe ajo e shtetit serb.
Komuna e Bayernit ka kërkuar në vazhdimësi tërheqjen e shtetësisë serbe nga certifikatat e kosovarëve.
Se kosovarët kanë probleme me shtetësinë e fëmijëve të tyre në këto dy lande të Gjermanisë, Shtutgart dhe Munih, është në dijeni edhe Qeveria e Kosovës.
Bazuar në deklaratat me konsullatat në këto lande, ky problem i është kumtuar secilës qeveri të pas Pavarësisë në Kosovë.
Por ato nuk kanë ndërmarrë asnjë hap konkret për ta larguar shtetësinë e tretë që është ajo serbe, që vendoset në certifikatat e fëmijëve të kosovarëve, prindërit e të cilëve kanë shtetësi gjermane.
