Papa Françesku tha të premten se të dy kandidatët presidencialë të SHBA-së përqafojnë pozicione “anti-jetës”, një referencë ndaj politikave të imigracionit të Donald Trump dhe mbështetjes së Kamala Harris për të drejtat e abortit.
Duke folur me gazetarët në bordin e avionit të tij teksa kthehej në Romë pas një turneu 12-ditor aziatik, Papa tha: “Ata të dy janë kundër jetës. Personi që përjashton emigrantët dhe personi që mbështet vrasjen e fëmijëve janë të dy kundër jetës.”
Papa shtoi: “Unë nuk jam amerikan dhe nuk do të marr pjesë në votimin atje, por le të jemi të qartë: të largosh migrantët dhe të mos u japësh atyre mundësi për të punuar apo t’i mirëpresësh është mëkat”. “Është e rrezikshme.”
Ish-presidenti i SHBA-së, Donald Trump, i cili po kërkon të kthehet në presidencë në zgjedhjet e ardhshme në nëntor, u zotua gjatë fushatës së tij të intensifikojë përpjekjet për dëbimin e emigrantëve të paligjshëm. Ai kontribuoi gjithashtu në përmbysjen e vendimit të Gjykatës së Lartë të SHBA-së të vitit 1973 në lidhje me çështjen “Roe kundër Wade”, i cili u jepte grave të drejtën për abort, një vendim që Kamala Harris u zotua ta riaktivizonte gjatë fushatës së saj zgjedhore.
Papa Françesku përfundoi duke thënë: “Ne duhet të zgjedhim të keqen më të vogël. Kush është më pak i dëmshëm? Është ajo zonjë apo ai burrë? Nuk e kam përgjigjen. Të gjithë duhet të reflektojnë për këtë çështje dhe të marrin vendimin e tyre sipas ndërgjegjes së tyre.”
Marrë nga: stepnews
