Ministri i Jashtëm palestinez, Al-Maliki tha se është përgjegjësi e botës arabe dhe islame të kundërshtojnë qëndrimin agresiv të Izraelit ndaj vendeve të shenjta
Ministri i Jashtëm palestinez, Riyad Al-Maliki deklaroi se është përgjegjësi e botës arabe dhe islame të kundërshtojnë qëndrimin agresiv të Izraelit ndaj vendeve të shenjta, transmeton Anadolu Agency (AA).
Në një deklaratë me shkrim nga Ministria e Jashtme palestineze, pas zhvillimeve në Xhaminë Al-Aksa që ndodhet në Kudsin Lindor nën pushtim, thuhet se nëpërmjet sekretarit të përgjithshëm të Ligës Arabe, Ahmed Aboul Gheit, ministri palestinez Al-Maliki i ka dërguar mesazh sekretarit të përgjithshëm të Organizatës për Bashkëpunim Islam (OBI), Husein Ibrahim Taha.
Al-Maliki i ka bërë thirrje Ligës Arabe dhe OBI-t që bashkë me të gjitha palët të kalojnë në veprim për të mbështetur Kudsin dhe vendet e shenjta që i përkasin feve të krishtere dhe asaj islame në Kuds. Ministri Al-Maliki theksoi se është përgjegjësi e botës arabe dhe islame të kundërshtojnë qëndrimin agresiv të Izraelit ndaj Kudsit dhe vendeve të shenjta.
Lidhur me lëvizjen e botës arabe dhe asaj islame për të formuar presionin më të rëndë mbi Izraelin për sigurimin e tërheqjes së forcave pushtuese nga Kudsi dhe për sigurimin e mbrojtjes ndërkombëtare për popullin palestinez, Al-Maliki tha se presioni është i nevojshëm të thellohet në nivel politik, diplomatik dhe ligjit ndërkombëtar.
Ai bëri të ditur se skenat e përgjakshme të përjetuara mëngjesin e sotëm në Xhaminë Al-Aksa janë përsëritur për të lehtësuar bastisjet e hebrenjve fanatikë si dhe për të konsoliduar ndarjen e saj në aspektin kohor dhe vendor.
– Bastisje në Xhaminë Al-Aksa pas namazit të sabahut
Pas ditës së premte forcat izraelite sërish mëngjesin e sotëm pas namazit të sabahut kryen bastisje në Xhaminë Al-Aksa duke nxjerrë palestinezët jashtë me detyrim dhe pas kësaj mbylli dyert e Xhamisë Al-Aksa për palestinezët.
Gjatë bastisjes në Xhaminë Al-Aksa policia izraelite goditi disa palestinezë dhe më pas grupet e kolonëve hebrenj fanatikë nën mbrojtjen e policisë kryen bastisje në Xhaminë Al-Aksa.
Administrata e Fondacioneve Islame të Kudsit tha se në Al-Aksa kanë hyrë 545 kolonë hebrenj.
Me rastin e Festës Pesach e cila filloi të premten më 15 prill dhe e cila vazhdon për një javë, hebrenjtë fanatikë i shtojnë bastisjet e tyre në Xhaminë Al-Aksa nën shoqërimin e policisë izraelite.
Ndërsa palestinezët që përpiqen të reagojnë me tekbire kundër bastisjeve në Xhaminë Al-Aksa përballen me ndërhyrjen e forcave izraelite.
