Kreu i AKR-së, Behgjet Pacolli nëpërmes llogarisë së tij në Facebook ka njoftuar se ka biseduar me presidentin ugandas, Moseveni, duke thënë se Ministria e Punëve të Jashtme të Ugandës do të dërgojë notën e premtuar verbale për njohjen e Republikës së Kosovës.
Ai ka udhëtuar mbrëmë drejt Kampalas, kryeqytetit së Ugadës, vendi që sipas Pacollit, do të mbështesë integrimin ndërkombëtar të Kosovës.
Postimi i plotë i Behgjet Pacollit:
Mbrëmë udhëtova për në Uganda. Arrita në orët e hershme në Kampala, kryeqytetin e Ugandës, dhe menjëherë udhëtova për në vendin e takimit me Presidentin Moseveni, disa qindra km nga Kampalla.
Në një takim të gjatë dhe miqësor, diskutuam për hapat e mëtutejshëm në mënyrë që ky shtet të perfeksionojë formalisht njohjën e Kosovës. Gjegjësisht Ministria e Punëve të Jashtme të këtij shteti ta dërgojë notën e premtuar verbale për njohjën e Republikës së Kosovës.
Një është e sigurt, se Uganda do ta mbështesë integrimin ndërkombëtar të Kosovës.
Diskutuam edhe strategjinë për qasje të përbashkët të Ugandës për Angolën, Afrikën e Jugut dhe Etiopinë ku Presidenti Moseveni gëzon respekt të veçantë. Po ashtu, kemi rënë dakord për një takim të ardhshëm pas Zgjedhjeve Presidenciale të muajit shkurt.
