“Në vitin 2023, dhuna ndaj fëmijëve në konflikte të armatosura arriti nivele ekstreme, me një rritje tronditëse prej 21 për qind të shkeljeve të rënda”, thuhet në raportin e OKB-së
Organizata e Kombeve të Bashkuara (OKB) ka shtuar forcat e armatosura dhe të sigurisë izraelite në listën e “palëve që kryejnë shkelje të rënda që prekin fëmijët në situata konflikti të armatosur”, sipas një raporti.
Parë nga Anadolu, raporti që ende nuk do të publikohet dhe i cili përmban të dhëna për vitin 2023, thotë: “Në vitin 2023, dhuna ndaj fëmijëve në konflikte të armatosura arriti nivele ekstreme, me një rritje tronditëse prej 21 për qind të shkeljeve të rënda”.
Duke vënë në dukje një rritje me 35 për qind të incidenteve që kanë çuar në vdekjen dhe lëndimin e fëmijëve në krahasim me vitin e kaluar, raporti thotë: “Kombet e Bashkuara verifikuan 32.990 shkelje të rënda, nga të cilat 30.705 janë kryer në vitin 2023 dhe 2.285 më herët, por u verifikuan në vitin 2023”.
Sipas raportit, në vitin 2023, të paktën 5.301 fëmijë janë vrarë, 6.348 fëmijë janë plagosur, 8.655 fëmijë janë rekrutuar në grupe të armatosura, 5.205 fëmijëve u është mohuar qasja në ndihma humanitare, 2.491 fëmijë janë ndaluar për shkak të lidhjeve me grupe të armatosura dhe 4.356 fëmijë janë rrëmbyer.
– Për herë të parë përfshihet Izraeli
Sipas raportit, në dritën e zhvillimeve të fundit në Gaza, shkeljet e rënda ndaj fëmijëve në Izrael dhe territoret e pushtuara palestineze janë rritur me 155 për qind. Në këtë kuadër, janë regjistruar të paktën 8.009 raste të rënda të shkeljeve. Këto shkelje kanë prekur 4.360 fëmijë, nga të cilët 113 izraelitë dhe 4.247 ishin palestinezë.
Raporti thotë se ka pasur 7.837 shkelje ndaj 4.247 fëmijëve palestinezë në Gaza, Bregun Perëndimor të pushtuar dhe Kudsin Lindor. Ai vë në dukje se këto shkelje janë kryer nga ushtria izraelite dhe kolonët e paligjshëm izraelitë.
Më tej theksohet se ushtria izraelite dhe forcat e sigurisë ishin përgjegjëse për 5.698 nga këto shkelje. Duke thënë se Izraeli ka arrestuar 906 fëmijë palestinezë, raporti gjithashtu tregon se OKB-ja ka informacione për fëmijët që i nënshtrohen keqtrajtimit dhe abuzimit seksual.
Raporti thekson gjithashtu se ushtria izraelite ka penguar aksesin e fëmijëve në ndihma humanitare në Gaza, Bregun Perëndimor të pushtuar dhe Kudsin Lindor. Përveç ushtrisë dhe forcave të sigurisë izraelite, në listë janë përfshirë edhe krahu i armatosur i Hamasit, Brigadat Kassam si dhe Brigada Al-Kuds, krahu i armatosur i grupit palestinez Xhihadi Islam.
Në raport thuhet se 23 mijë shkelje të rënda janë në pritje të konfirmimit për shkak të situatës në Gaza në tremujorin e fundit të vitit 2023.
Sekretari i Përgjithshëm i OKB-së, Antonio Guterres deklaron në raport: “Jam i tronditur nga numri i paprecedentë i fëmijëve të vrarë dhe të gjymtuar nga ushtria izraelite dhe forcat e sigurisë në Rripin e Gazës dhe Bregun Perëndimor të pushtuar, përfshirë Kudsin Lindor”.
– Fushat kryesore të shkeljeve
Në raport thuhet se vendet ku shkeljet ndaj fëmijëve janë më intensive janë Izraeli dhe territoret e pushtuara palestineze, Republika Demokratike e Kongos, Mianmari, Somalia, Nigeria dhe Sudani.
Është raportuar se ka pasur 3.764 shkelje të rënda në Republikën Demokratike të Kongos, 2.799 në Mianmar, 2.283 në Somali, 1.995 në Nigeri dhe 1.721 në Sudan. Raporti njofton se forcat ruse të sigurisë janë ende në listë për shkak të shkeljeve në Ukrainë, me 938 raste shkeljesh të rënda të regjistruara në Ukrainë.
Duke theksuar se aktorët joshtetërorë janë përgjegjës për 50 për qind të shkeljeve të rënda, me forcat qeveritare që luajnë rolin më të madh në vdekjet dhe lëndimet e fëmijëve, raporti përmend më tej se fëmijë meshkuj rekrutohen, vriten dhe plagosen në grupe të armatosura në shkallë më të lartë, ndërsa fëmijët femra i nënshtrohen dhunës seksuale në shkallë më të lartë.
