Lindmeier, një zëdhënës i OBSH-së, tha se “njerëzit në Gaza po jetojnë në një katastrofë, të ekspozuar ndaj vdekjes nga uria, kequshqyerja, etja ose nga plumbat dhe lëndimet mbi kokat e tyre”
Palestinezët nga kampi i refugjatë Jabalia në veri të Rripit të Gazës u rreshtuan në një cisternë uji duke mbajtur enë plastike në dorë, por për shumë prej tyre pritja do të jetë e kotë, raporton Anadolu.
Cisterna e ujit ka kapacitet të kufizuar dhe nuk mund të sigurojë ujë për qindra palestinezët që kalojnë orë të gjatë duke pritur çdo ditë.
Rripi i Gazës vuan nga një krizë e rëndë e ujit për shkak të infrastrukturës së shkatërruar në luftën e vazhdueshme.
Situata është veçanërisht e rëndë në pjesën veriore të enklavës.
Pas sulmit të 7 tetorit nga grupi palestinez Hamas, Izraeli ka ndërprerë furnizimin me ujë, ushqim, ilaçe, energji elektrike dhe karburant për 2.3 milionë palestinezët në Gaza.
Sipas Autoritetit Palestinez të Ujit, objektet e shkripëzimit dhe rrjetet e ujërave të zeza në Gaza janë ndërprerë për shkak të mungesës së karburantit dhe energjisë elektrike që nga mesi i muajit tetor të vitit të kaluar.
Kombet e Bashkuara (OKB) kanë paralajmëruar vazhdimisht për përhapjen e sëmundjeve për shkak të krizës së ujit, shoqëruar me mungesën e furnizimeve higjienike.
Christian Lindmeier, një zëdhënës i Organizatës Botërore të Shëndetësisë (OBSH), për Anadolu tha se “njerëzit në Gaza po jetojnë në një katastrofë, të ekspozuar ndaj vdekjes nga uria, kequshqyerja, etja ose nga plumbat dhe lëndimet mbi kokat e tyre”.
Uji i ndotur
Në një zonë tjetër të kampit, palestinezët grumbullohen rreth një prej burimeve të ujit të shkatërruara nga ushtria izraelite, duke u përpjekur të mbushin direkt nga atje.
Karam Abu Nada, një palestinez rreth të 30-tave që pret radhë për të mbushur ujë nga burimi i shkatërruar, thotë se banorët e kampit “mblidhen për të marrë ujë pavarësisht nga kontaminimi i tij”.
Ai për Anadolu tha se zakonisht përdorin ujin e ndotur për larje, pastrim dhe gatim, duke theksuar se ndonjëherë ata presin deri në 10 ditë për të siguruar këtë ujë.
Banorët e Gazës janë të detyruar të racionojnë konsumin e ujit pasi ai është i disponueshëm vetëm disa ditë. Ato minimizojnë sasinë e përdorur për larje të teshave, larje të enëve dhe pastrim.
Abu Nada thotë se ata janë të prekur nga uji i ndotur, veçanërisht fëmijët, duke shkaktuar sëmundje të zorrëve dhe lëkurës mes mungesës së ilaçeve për trajtimin e tyre.
Përhapja e sëmundjeve
Raed Radwan, një palestinez 50-vjeçar nga qyteti i Gazës, thotë se familja e tij është përballur me një krizë të vazhdueshme të ujit.
“Ne marrim ujë duke mbushur disa galona plastike nga një prej klubeve në zonën ku banojmë, i cili pompon ujë nga një pus privat një herë në 3-4 ditë për shkak të mungesës së karburantit”, thotë ai.
Siç thekson ai, sasia që marrin nuk është e mjaftueshme për të plotësuar nevojat e familjes së tij as për një ditë të vetme, duke i detyruar ata të reduktojnë konsumin e tyre.
Para luftës, shpjegon Radwan, ky ujë përdorej vetëm për larjen e enëve dhe pastrim, por sot përdoret edhe për pije, gjë që ka shkaktuar disa sëmundje duke filluar nga infeksionet gastrointestinale deri te sëmundjet e veshkave dhe dehidratimi.
Ai kritikoi heshtjen e botës për atë që po përballen palestinezët.
25-vjeçari Yusuf Hamad, i cili u largua nga qyteti verilindor Beit Hanoun në një nga qendrat e strehimit në Jabalia, tha se mijëra njerëz të zhvendosur po vuajnë nga kushtet shëndetësore për shkak të mungesës së ujit.
“Ne kemi vuajtur nga një krizë e rëndë e ujit për më shumë se tre muaj, pasi marrim sasi të vogla çdo disa ditë për shkak të mungesës së karburantit”, theksoi Hamad.
Ai thotë se mungesa e ujit ka bërë që shumica e njerëzve të zhvendosur, veçanërisht fëmijët, të preken nga sëmundje gastrointestinale dhe të lëkurës për shkak të mungesës së higjienës.
Institucionet shëndetësore vendore dhe ndërkombëtare vazhdimisht kanë paralajmëruar për përhapjen e sëmundjeve dhe epidemive në mesin e të shpërngulurve për shkak të mungesës së ujit të nevojshëm për mbrojtjen e tyre nga sëmundjet.
Që nga 7 tetori, sipas autoriteteve palestineze, ushtria izraelite ka zhvilluar një luftë shkatërruese në Gaza, duke vrarë të paktën 26.637 palestinezë dhe 65.387 të tjerë të plagosur, shumica prej tyre fëmijë dhe gra.
